കോഴിക്കോട്: കൊവിഡ് പ്രതിസന്ധിയില്‍ ദുരിതത്തിലായ പ്രവാസികളോട് കേന്ദ്ര, സംസ്ഥാന സര്‍ക്കാരുകള്‍ സ്വീകരിച്ച നിലപാട് വേദനാജനകമാണെന്ന് എസ്.വൈ.എസ് സംസ്ഥാന സെക്രട്ടേറിയറ്റ് അഭിപ്രായപ്പെട്ടു.

 കടുത്ത നിയന്ത്രണങ്ങള്‍ ഏര്‍പ്പെടുത്തുകയും ക്വാറന്റൈന്‍ ചെലവ് ചുമത്തുകയും ചെയ്യുന്ന നിലപാടുകളാണു സ്വീകരിച്ചു വരുന്നത്. ഇതു തിരുത്താന്‍ സര്‍ക്കാരുകള്‍ തയാറാകണമെന്നും യോഗം ആവശ്യപ്പെട്ടു. 

നാട്ടിലെത്താന്‍ ആഗ്രഹിക്കുന്ന മുഴുവന്‍ പ്രവാസികള്‍ക്കും യാത്രാസൗകര്യവും സൗജന്യ ക്വാറന്റൈനും ഏര്‍പ്പെടുത്തണം. പരസ്പര ഏകോപനമില്ലായ്മയും താല്‍പര്യക്കുറവും പ്രവാസികളുടെ മടക്കത്തിനു തടസമാവുകയാണ്. ഇക്കാര്യത്തില്‍ അടിയന്തര ഇടപെടല്‍ ഉണ്ടാകാന്‍ വ്യാപക പ്രതിഷേധങ്ങള്‍ ഉയര്‍ന്നുവരണമെന്നും യോഗം ആവശ്യപ്പെട്ടു.

പ്രവാസികള്‍ക്കെതിരേയുള്ള നീതിനിഷേധത്തിനെതിരേ 21നു രാവിലെ 10.10നു എല്ലാ യൂനിറ്റുകളിലും പ്രവര്‍ത്തകര്‍ പ്രതിഷേധമുറ്റം തീര്‍ക്കുമെന്ന് ഭാരവാഹികള്‍ അറിയിച്ചു. ജൂലൈ 31നകം ജില്ലാ കൗണ്‍സില്‍ വിളിച്ചുചേര്‍ത്ത് ജില്ലാ കമ്മിറ്റികള്‍ രൂപീകരിക്കും. ഓഗസ്റ്റ് 31നകം സംസ്ഥാന കമ്മിറ്റിയും നിലവില്‍ വരും.

ജനറല്‍ സെക്രട്ടറി സയ്യിദ് മുഹമ്മദ് കോയ തങ്ങള്‍ ജമലുല്ലൈലി അധ്യക്ഷനായി. 

മലയമ്മ അബൂബക്കര്‍ ബാഖവി, കെ.എ റഹ്മാന്‍ ഫൈസി, മൊയ്തീന്‍ ഫൈസി പുത്തനഴി, നാസര്‍ ഫൈസി കൂടത്തായി, കൊടക് അബ്ദുറഹിമാന്‍ മുസ്‌ലിയാര്‍, മുസ്തഫ മുണ്ടുപാറ, ടി.കെ മുഹമ്മദ് കുട്ടി ഫൈസി പട്ടാമ്പി, ഹംസ റഹ്മാനി കൊണ്ടിപ്പറമ്പ്, സ്വലാഹുദ്ദീന്‍ ഫൈസി വല്ലപ്പുഴ, സലിം എടക്കര പ്രസംഗിച്ചു. 

പിണങ്ങോട് അബൂബക്കര്‍ സ്വാഗതം പറഞ്ഞു. അന്തരിച്ച സംസ്ഥാന ട്രഷറര്‍ മെട്രോ മുഹമ്മദ് ഹാജിക്കു വേണ്ടി നടന്ന പ്രാര്‍ഥനയ്ക്ക് സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം നല്‍കി.