കാസര്‍കോട്: സ്‌കൂള്‍ വിദ്യാര്‍ഥികളുമായി പോവുകയായിരുന്ന ഓട്ടോറിക്ഷയും തെരഞ്ഞെടുപ്പ് ജോലി ചെയ്യുന്ന ഉദ്യോഗസ്ഥരുമായി പോവുകയായിരുന്ന ബൊലേറോ കാറും കൂട്ടിയിടിച്ച് നാലുപേര്‍ക്ക് പരുക്കേറ്റു. ഇതില്‍ രണ്ട് വിദ്യാര്‍ഥിനികളുടെയും ഓട്ടോറിക്ഷ ഡ്രൈവറുടെയും പരുക്ക് ഗുരുതരമാണ്.
അപകടങ്ങള്‍ പതിവായി മാറിയ കാസര്‍കോട്-കാഞ്ഞങ്ങാട് കെ.എസ്.ടി.പി.പാതയില്‍ ചളിയങ്കോട് കോട്ടരുവം പ്രദേശത്ത് ഇന്നലെ ഉച്ചക്ക് രണ്ടരയോടെയാണ് സംഭവം.
മൊഗ്രാല്‍ പുത്തൂര്‍ ജി.എച്ച്.എസ്.എസിലെ വിദ്യാര്‍ഥിനിയും ചളിയങ്കോട്ടെ കബീറിന്റെ മകളുമായ നഫീസാ റാസില, സഹോദരി ആറാം ക്ലാസ് വിദ്യാര്‍ഥിനി ഫാത്വിമ (11), ഓട്ടോറിക്ഷ ഡ്രൈവര്‍ അബ്ദുര്‍ റഹീം (44) എന്നിവര്‍ക്കാണ് ഗുരുതരമായി പരുക്കേറ്റത്. ഇവരെ മംഗളൂരുവിലെ ആശുപത്രിയില്‍ പ്രവേശിപ്പിച്ചു. മറ്റൊരു വിദ്യാര്‍ഥിനി നാഫിലയെ കാസര്‍കോട് ജനറല്‍ ആശുപത്രിയില്‍ പ്രവേശിപ്പിച്ചു.
മൊഗ്രാല്‍ പുത്തൂരിലെ സ്‌കൂളില്‍നിന്ന് വിദ്യാര്‍ഥികളെയും കയറ്റി വരുകയായിരുന്ന ഓട്ടോറിക്ഷ മേല്‍പറമ്പ് ഭാഗത്തുനിന്ന് കാസര്‍കോട്ടേക്ക് വരുകയായിരുന്ന ഉദുമ പഞ്ചായത്തിന്റെ ബൊലോറോ കാറുമായാണ് കൂട്ടിയിടിച്ചത്. ഇടിയുടെ ആഘാതത്തില്‍ കാര്‍ മറിയുകയും ചെയ്തു.