കോഴിക്കോട്: വെള്ളയില്‍ ഗവ. ഫിഷറീസ് യു.പി സ്‌കൂളില്‍ സാമൂഹ്യവിരുദ്ധരുടെ വിളയാട്ടം.
കുട്ടികള്‍ക്കു പ്രഭാതഭക്ഷണത്തിനും ഉച്ചയൂണിനുമുള്ള അരിയും പലവ്യഞ്ജനങ്ങളും പച്ചക്കറികളും നശിപ്പിച്ചു. സ്‌കൂളിന് അകത്തു കയറി ഭക്ഷ്യവസ്തുക്കളെടുത്ത് തീയിട്ട് നശിപ്പിച്ചതിന് പുറമെ പ്രാവിനെ കൊന്ന് ചുട്ടു തിന്നാണ് സംഘം മടങ്ങിയത്. പാചകത്തിനുള്ള ഗ്യാസ് തുറന്നിട്ടിരുന്നു. തീപിടിത്തമുണ്ടാകാത്തതിനാല്‍ വന്‍ ദുരന്തമൊഴിവായി. ബുധാനാഴ്ച രാത്രിയാണ് സംഭവം. ഉച്ചയൂണിനുള്ള അരിയും പയറും പച്ചക്കറികളും വാരി വിതറിയും തീയിട്ടുമാണ് നശിപ്പിച്ചത്. ക്ലാസ് മുറി അലങ്കോലമാക്കിയ ശേഷം സംഘം മടങ്ങുകയായിരുന്നു. സ്‌കൂള്‍ അധികൃതരുടെ പരാതിയില്‍ വെള്ളയില്‍ പൊലിസ് കേസെടുത്തിട്ടുണ്ട്. വിരലടയാള വിദഗ്ധര്‍ സ്‌കൂളിലെത്തി തെളിവ് ശേഖരിച്ചു.