പട്ടാമ്പി: വര്‍ഷങ്ങളായി പട്ടാമ്പി ഗവ. സംസ്‌കൃത കോളജിലെ വിദ്യാര്‍ഥികള്‍ക്ക് സൗകര്യപ്രദമായ ബസ് കാത്തിരിപ്പ് കേന്ദ്രമില്ലെന്ന പരാതിക്ക് പരിഹാരമായി നഗരസഭയുടെ കീഴില്‍ നിര്‍മിച്ച കാത്തിരിപ്പ് കേന്ദ്രത്തിന്റെ പണി പൂര്‍ത്തിയായി. പട്ടാമ്പി- ചെര്‍പ്പുളശ്ശേരി റോഡില്‍ സ്ഥിതി ചെയ്യുന്ന ഗവ.കോളജിന്റെ ഒരു വശത്ത് മാത്രമാണ് നിലവില്‍ കാത്തിരിപ്പ് കേന്ദ്രമുണ്ടായിരുന്നത്.
കാലപ്പഴക്കത്താല്‍ ഇത് നാശത്തിന്റെ വക്കിലാണ്. പുനര്‍ നിര്‍മിക്കണമെന്ന ആവശ്യം നിലനില്‍ക്കുന്നുണ്ട്. എന്നാല്‍ പട്ടാമ്പി ഭാഗത്തേക്ക് പോകുന്ന വിദ്യാര്‍ഥികള്‍ക്ക് ബസ് കാത്തിരിപ്പ് കേന്ദ്രം ഉണ്ടായിരുന്നില്ല.
പല സമയങ്ങളിലായി ബന്ധപ്പെട്ടവരുടെ ശ്രദ്ധയില്‍പ്പെടുത്തിയിരുന്നെങ്കിലും നടപടി ഉണ്ടായിരുന്നില്ല.
മഴയും വെയിലും കൊണ്ട് ബസ് കാത്ത് നില്‍ക്കേണ്ടിവരുന്ന വിദ്യാര്‍ഥികളുടെ പ്രയാസം മനസിലാക്കിയ യു.എസ്.ഡി.എഫ് പ്രവര്‍ത്തകര്‍ വിദ്യാര്‍ഥികളില്‍ നിന്നും ഒപ്പ് ശേഖരണം നടത്തി മുന്‍സിപ്പല്‍ ചെയര്‍മാന്‍ കെ.പി വാപ്പുട്ടിക്ക് നിവേദനം നല്‍കിയതോടെയാണ് കാത്തിരിപ്പ് കേന്ദ്ര നിര്‍മാണത്തിനുള്ള വഴി തുറന്നത്.
നിലവില്‍ ടാക്‌സി ഓട്ടോ നിര്‍ത്തിയിട്ടിരുന്ന ഭാഗത്താണ് നഗരസഭയുടെ പുതിയ കാത്തിരിപ്പ് കേന്ദ്രം നിര്‍മിച്ചിരിക്കുന്നത്.