കല്‍പ്പറ്റ: നഗരത്തിലെ ഹോട്ടലുകളില്‍ നിന്നും വീണ്ടും പഴകിയ ഭക്ഷണങ്ങള്‍ പിടിച്ചെടുത്തു. നഗരസഭ ആരോഗ്യവിഭാഗംനടത്തിയ പരിശോധനയിലാണ് ആറ് സ്ഥാപനങ്ങളില്‍ നിന്നും ഭക്ഷ്യയോഗ്യമല്ലാത്ത സാധനങ്ങള്‍ പിടിച്ചെടുത്തത്.
ഫാത്തിമ കാന്റീന്‍, കൈനാട്ടി പ്രിയ ഹോട്ടല്‍, ലഞ്ച് ഹൗസ്, എസ്.എസ് വനിതാ മെസ് തുടങ്ങിയ സ്ഥാപനങ്ങളിലാണ് റെയ്ഡ് നടത്തിയത്. ബീഫ്, പൊറോട്ട, ചപ്പാത്തി, പഴകിയ മാവ്, പഴംപൊരി, പഴകിയ എണ്ണ, ചോറ്, പപ്പടം തുടങ്ങിയവയെല്ലാം പിടിച്ചെടുത്തതിലുണ്ട്.
ഭക്ഷ്യസുരക്ഷ ഉറപ്പാക്കുന്നതിന്റെ ഭാഗമായി ഹോട്ടലുകളിലും മറ്റും നടത്തുന്ന പരിശോധനകളുടെ തുടര്‍ച്ചയായാണ് വ്യാഴാഴ്ച രാവിലെ റെയ്ഡ് നടത്തിയത്. സ്ഥാപന ഉടമകളില്‍നിന്നും പിഴ ഈടാക്കും.പഴകിയ ഭക്ഷ്യവസ്തുക്കള്‍ പിടികൂടിയാല്‍ സ്ഥാപനത്തിന്റെ ലൈസന്‍സ് റദ്ദാക്കുന്നത് സംബന്ധിച്ച തീരുമാനം ഒന്‍പതിന് നടക്കുന്ന കൗണ്‍സില്‍ യോഗത്തില്‍ എടുക്കുമെന്ന് ചെയര്‍പേഴ്‌സണ്‍ സനിതാജഗദീഷ് പറഞ്ഞു.
ഹെല്‍ത്ത് ഇന്‍സ്‌പെക്ടര്‍ ബദറുദീന്‍, ബോബിഷ്, ബിജു, ഷാരിസ്, ഷൈജു എന്നിവരുടെ നേതൃത്വത്തിലായിരുന്നു റെയ്ഡ്.