ആറ്റിങ്ങല്‍: പ്രാദേശിക വികസന ഫണ്ട് ഉപയോഗിച്ച് മണ്ഡലത്തിലെ എല്ലാ പ്രാഥമിക ആരോഗ്യ കേന്ദ്രത്തിലും പാലിയേറ്റീവ് കെയര്‍ ആംബുലന്‍സ് വിതരണം ചെയ്യുമെന്ന് ഡോ. എ.സമ്പത്ത് എം.പി ആറ്റിങ്ങല്‍ ഗസ്റ്റ് ഹൗസില്‍ നടന്ന വാര്‍ത്താ സമ്മേളനത്തില്‍ പറഞ്ഞു. പരീക്ഷണാടിസ്ഥാനത്തില്‍ കിളിമാനൂര്‍, മണമ്പൂര്‍, മാറനല്ലൂര്‍ എന്നീ പഞ്ചായത്തുകളിലെ ഹെല്‍ത്ത് സെന്ററുകള്‍ക്കായി നല്‍കിയ ആംബുലന്‍സിന്റെ പ്രവര്‍ത്തനം പഞ്ചായത്ത് ജനോപയോഗ പ്രദമായ രീതിയില്‍  നടത്തുന്നത് കേരളത്തിന് ഒരു മാതൃകയായിട്ടുണ്ടെന്നും ഇതിന്റെ അടിസ്ഥാനത്തിലാണ് എല്ലാ പഞ്ചായത്തുകളിലേയും പ്രാഥമികാരോഗ്യ കേന്ദ്രത്തിന് ആംബുലന്‍സ് നല്‍കാന്‍ തീരുമാനിച്ചതെന്നും അദ്ദേഹം പറഞ്ഞു.
ഇതിന്റെ ആദ്യ ഘട്ടമെന്ന നിലയില്‍ തിരുവനന്തപുരത്ത് 28 ന് നടക്കുന്ന ചടങ്ങില്‍ മുഖ്യമന്ത്രി പിണറായി വിജയന്‍ 13 ആംബുലന്‍സുകള്‍ വിതരണം ചെയ്യും. മംഗലാപുരം, വീരണകാവ്, കുറ്റിച്ചല്‍, കല്ലറ, മലയിന്‍കീഴ്, കിഴുവിലം, ചെമ്മരുതി, പുല്ലമ്പാറ, ചെറുന്നിയൂര്‍, ഉഴമലയ്ക്കല്‍, മാണിയ്ക്കല്‍, പെരിങ്ങമല, ആര്യനാട് എന്നീ പ്രാഥമിക ആരോഗ്യ കേന്ദ്രത്തിനാണ് ആദ്യ ഘട്ട അംബുലന്‍സ് നല്‍കുക. ഇതോടൊപ്പംമുനിസിപ്പാലിറ്റികളായ ആറ്റിങ്ങല്‍, വര്‍ക്കല, നെടുമങ്ങാട്എന്നിവിടങ്ങളിലേയ്ക്ക് ആധുനിക സൗകര്യമുള്ള ആംബുലന്‍സുകളും വിതരണം ചെയ്യും.ഈ വര്‍ഷം തന്നെ എല്ലാ ഗ്രാമ പഞ്ചായത്തുകളിലെ ഹെല്‍ത്ത് സെന്ററുകള്‍ക്കും ആംബുലന്‍സ് ലഭ്യമാക്കുക എന്നതാണ് ലക്ഷ്യം. മെഡിക്കല്‍ ഓഫിസര്‍ക്കാണ് ആംബുലന്‍സിന്റെ ചുമതലയെങ്കിലും പഞ്ചായത്ത് അംഗങ്ങള്‍ ശ്രദ്ധചെലുത്തി സൗകര്യം പ്രയോജനപ്പെടുത്തണമെന്നും ബി.പി.എല്‍കാര്‍ക്ക് സൗജന്യമായും എ.പി.എല്‍ കാര്‍ക്ക് കുറഞ്ഞ നിരക്കിലും ആംബുലന്‍സ് സേവനം ലഭ്യമാക്കുകയാണ് ലക്ഷ്യമെന്നും അദ്ദേഹം പറഞ്ഞു.