തൃശൂര്‍: തൃശൂര്‍ നഗരത്തില്‍ മാവോയിസ്റ്റ് അനുകൂല പോസ്റ്ററുകള്‍ കണ്ടെത്തിയ സംഭവത്തില്‍ ഈസ്റ്റ് പൊലിസ് അന്വേഷണം ആരംഭിച്ചു. കഴിഞ്ഞ ദിവസം അര്‍ധരാത്രിയിലാണ് സാഹിത്യ അക്കാദമിക്കും ടൗണ്‍ഹാളിനും മുന്‍വശത്തും സ്വരാജ് റൗണ്ട് പരിസരപ്രദേശങ്ങളിലുമായി പോസ്റ്ററുകള്‍ പതിച്ച നിലയില്‍ കണ്ടെത്തിയത്.

വയനാട് വൈത്തിരിയില്‍ തണ്ടര്‍ബോള്‍ട്ടുമായുള്ള ഏറ്റുമുട്ടലില്‍ കൊല്ലപ്പെട്ട സി.പി ജലീലിന്റെ ചിത്രം പതിച്ച പോസ്റ്ററുകളാണ് പതിച്ചിരിക്കുന്നത്. പോസ്റ്ററുകളില്‍ മൊബൈല്‍ നമ്പറും നല്‍കിയിട്ടുണ്ട്. രക്തദാഹികളായ തണ്ടര്‍ബോള്‍ട്ട് സേനയെ പിരിച്ചുവിടുക, ജലീലിന്റെ ഘാതകരെ അറസ്റ്റുചെയ്യുക തുടങ്ങിയ ആവശ്യങ്ങളാണ് പോസ്റ്ററിലുള്ളത്. മാവോയിസ്റ്റ് സാന്നിധ്യം തൃശൂരിലുള്ളതായി മുന്‍പും പൊലിസിന് വിവരം ലഭിച്ചിരുന്നതാണ്. സി.സി.ടി.വി ദൃശ്യങ്ങള്‍ പരിശോധിച്ചാണ് അന്വേഷണം നടക്കുന്നത്. പോസ്റ്ററുകള്‍ പൊലിസ് എത്തി നശിപ്പിച്ചു. നഗരത്തില്‍ നിരീക്ഷണം ശക്തമാക്കിയിട്ടുണ്ട്.