അനൂപ് പെരിയല്‍

നീലേശ്വരം: ജില്ലയിലെ അങ്കണവാടികളില്‍ 120 എണ്ണം പ്രവര്‍ത്തിക്കുന്നത് വാടകക്കെട്ടിടത്തില്‍. 1348 അങ്കണവാടികളാണ് ജില്ലയില്‍ ആകെയുള്ളത്. അതില്‍ 1175 എണ്ണത്തിനു മാത്രമാണ് സ്വന്തമായി കെട്ടിടമുള്ളത്. ബാക്കിയുള്ളതില്‍ 120 എണ്ണമാണ് വാടകക്കെട്ടിടത്തില്‍ പ്രവര്‍ത്തിക്കുന്നത്. ശേഷിക്കുന്നവ സൗജന്യമായി ലഭിച്ച കെട്ടിടങ്ങളിലും പ്രവര്‍ത്തിച്ചു വരുന്നു.
വാടകയിനത്തില്‍ വലിയ തുകയാണ് മാസം തോറും ഇതിനായി ചെലവാകുന്നത്. വിവിധ തദ്ദേശഭരണ സ്ഥാപനങ്ങളിലായി 82,100 രൂപ പ്രതിമാസം വേണ്ടിവരുന്നുണ്ട്. നഗരസഭകളില്‍ കാസര്‍കോട് നഗരസഭയാണ് ഈ ഇനത്തില്‍ കൂടുതല്‍ തുക ചെലവഴിക്കുന്നത് (21,000 രൂപ). നീലേശ്വരം (20,000), കാഞ്ഞങ്ങാട് (12,000) എന്നിങ്ങനെയാണ് മറ്റു നഗരസഭകളുടെ കണക്ക്.
പഞ്ചായത്തുകളില്‍ ചെറുവത്തൂരിനാണ് കൂടുതല്‍ തുക വാടകയിനത്തില്‍ വേണ്ടിവരുന്നത് (2850 രൂപ). 2015 - 16 സാമ്പത്തിക വര്‍ഷം അങ്കണവാടി ഓണ്‍ ഡിമാന്‍ഡ് പ്രകാരം 203 അങ്കണവാടികള്‍ കൂടി സംസ്ഥാനത്ത് അനുവദിച്ചിട്ടുണ്ട്. അതില്‍ 29 എണ്ണം ജില്ലയിലാണ്. ഇവ കൂടി വരുന്നതോടെ സ്വന്തമായി കെട്ടിടമില്ലാത്തവയുടെ എണ്ണവും വാടകയിനത്തില്‍ ചെലവാകുന്ന തുകയും ഇനിയും കൂടും.
വര്‍ഷംതോറും നിരവധി തുക അങ്കണവാടികള്‍ക്കായി നീക്കിവയ്ക്കുന്നുണ്ടെങ്കിലും ഇനിയും സ്വന്തമായി കെട്ടിടം പോലുമില്ലാത്ത അങ്കണവാടികളുണ്ടെന്നത് അധികൃതരുടെ അനാസ്ഥയുടെ തെളിവാണ്.
ആധുനിക സൗകര്യങ്ങളോടെ സ്വകാര്യ പ്രീ പ്രൈമറി വിദ്യാലയങ്ങള്‍ പെരുകുമ്പോഴും അങ്കണവാടികള്‍ക്ക് കെട്ടിടമില്ലെന്നത് ഇവയോട് അധികൃതര്‍ കാണിക്കുന്ന അവഗണനയാണ് വ്യക്തമാക്കുന്നത്.