കണ്ണൂര്‍: കാല്‍ടെക്‌സ് ജങ്ഷനിലെ ബസ് കാത്തിരിപ്പുകേന്ദ്രങ്ങള്‍ക്കു സമീപത്തെ ഓടകളില്‍ ചീഞ്ഞളിഞ്ഞ മാലിന്യം കെട്ടിക്കിടക്കുന്നു. കെ.എസ്.ആര്‍.ടി.സി ബസ്റ്റാന്‍ഡിനു മുന്‍വശത്തായി കാല്‍ടെക്‌സ് ജങ്ഷനിലെ അഞ്ചോളം ബസ് കാത്തിരിപ്പു കേന്ദ്രങ്ങള്‍ക്കരികിലൂടെ കടന്നുപോകുന്ന ഓടയിലാണ് മാലിന്യം കുമിഞ്ഞുകൂടി ദുര്‍ഗന്ധം വമിക്കുന്നത്. സമീപത്തെ ബസ് കാത്തിരിപ്പു കേന്ദ്രത്തില്‍ എത്തുന്നവര്‍ക്കാണ് ദുരിതം. നൂറു കണക്കിന് യാത്രക്കാര്‍ രാവിലെയും വൈകിട്ടും ആശ്രയിക്കുന്ന ഇവിടം ദുര്‍ഗന്ധം വമിക്കുന്നതിനാല്‍ മൂക്ക് പൊത്തിപ്പിടിക്കേണ്ട ഗതികേടിലാണ്.
ഇതിനു സമീപത്തെ വഴിയോര കച്ചവടക്കാരും ദുര്‍ഗന്ധം വമിക്കുന്നതിനാല്‍ ബുദ്ധിമുട്ട് അനുഭവിക്കുന്നുണ്ട്. മാലിന്യം കുമിഞ്ഞുകൂടി മാസങ്ങളായിട്ടും കോര്‍പറേഷന്‍ അധികൃതര്‍ ഇതൊന്നും കണ്ട മട്ടില്ല. രണ്ട് വര്‍ഷം മുന്‍പ് പുനര്‍നിര്‍മിച്ച ഓട പിന്നീട് വൃത്തിയാക്കിയിട്ടില്ലെന്നാണ് സമീപ പ്രദേശത്തുള്ളവരുടെ പരാതി. മാലിന്യം കടന്നുപോകേണ്ട വഴികളിലാകെ പ്ലാസ്റ്റിക് ഉള്‍പ്പെടെയുള്ള മാലിന്യങ്ങള്‍ അടിഞ്ഞുകൂടിയതാണ് കൂടുതല്‍ ദുരിതത്തിനു കാരണം.