പള്ളിക്കല്‍: സങ്കടക്കടലായി ചേലേമ്പ്ര പഞ്ചായത്തിലെ പൈങ്ങോട്ടൂര്‍. തന്നോടൊപ്പം അപകടത്തില്‍ പെട്ട മകള്‍ മരിച്ചതറിയാതെ മകള്‍ക്കു പിന്നാലെ നാലാംനാള്‍ പിതാവും യാത്രയായി. കഴിഞ്ഞ ഞായറാഴ്ചയാണ് ചേലേമ്പ്ര പൈങ്ങോട്ടൂര്‍ സ്വദേശി മുസ്തഫ (45) ഉം മകള്‍ ഫഹ്മിത ഹന്ന (10) യും വീട്ടില്‍നിന്ന് 100 മീറ്ററകലെ ദേശീയപാതയില്‍ അപകടത്തില്‍ പെടുന്നത്.
മകളെ മദ്‌റസയില്‍ കൊണ്ടുപോകവേ റോഡരികില്‍ നില്‍ക്കുകയായിരുന്ന ഇരുവരേയും അമിത വേഗതയില്‍ നിയന്ത്രണം വിട്ടെത്തിയ കാര്‍ ഇടിച്ചു തെറിപ്പിക്കുകയായിരുന്നു. സംഭവ ദിവസം രാത്രിയോടെ തന്നെ ഫഹ്മിത ഹന്ന മരണപ്പെട്ടിരുന്നു. ഇന്നലെ രാവിലെ പതിനൊന്നരയോടെയാണ് മുസ്തഫ മരണപ്പെടുന്നത്. ഗുരുതരാവസ്ഥയിലുള്ള മുസ്തഫയെ മകളുടെ മരണ വിവരം അറിയിക്കരുതെന്ന് ഡോക്ടര്‍മാര്‍ നിര്‍ദേശിക്കുകയായിരുന്നുവെന്നാണ് ബന്ധുക്കള്‍ പറഞ്ഞത്. മുസ്തഫയുടെ അഞ്ച് പെണ്‍മക്കളില്‍ ഇളയ കുട്ടിയായിരുന്നു മരണപ്പെട്ട ഹന്ന. മൂത്ത മകളെ രണ്ട് വര്‍ഷം മുന്‍പാണ് വിവാഹം കഴിപ്പിച്ചയച്ചത്. നിര്‍ധന കുടുംബത്തില്‍ പെട്ട മുസ്തഫ നേരത്തേ ഓട്ടോ ഡ്രൈവറായിരുന്നു. ആണ്‍കുട്ടികളില്ലാത്ത മുസ്തഫ ജീവിത പ്രാരാബ്ധങ്ങളില്‍നിന്ന് കുടുംബത്തെ കര കയറ്റുന്നതിനായി ഏഴ് വര്‍ഷം മുന്‍പാണ് വിദേശത്തേക്ക് പോയത്.
അവിടെ അറബിയുടെ വീട്ടില്‍ ഡ്രൈവറായി ജോലി ചെയ്ത് വരികയായിരുന്നു. റമദാനില്‍ വിദേശത്തുനിന്ന് 40 ദിവസത്തെ അവധിക്ക് നാട്ടിലെത്തിയ മുസ്തഫ തിരിച്ചു വിദേശത്തേക്ക് യാത്ര പോകാന്‍ ഒരാഴ്ച ബാക്കിയിരിക്കേയാണ് മക്കളേയും കുടുംബത്തേയും അനാഥരാക്കി എന്നെന്നേക്കുമായി യാത്രയായത്.