നീലേശ്വരം: കണ്ണൂര്‍ തളിപ്പറമ്പ് ആസ്ഥാനമായി പ്രവര്‍ത്തിച്ചു വന്നിരുന്ന സിഗ്സ് പണമിടപാട് സ്ഥാപനത്തിന്റെ നീലേശ്വരം സിറ്റി സെന്ററില്‍ പ്രവര്‍ത്തിച്ചിരുന്ന ശാഖയില്‍ കഴിഞ്ഞ ദിവസം നീലേശ്വരം പൊലിസ് റെയ്ഡ് നടത്തി. നിക്ഷേപവുമായി ബന്ധപ്പെട്ട നിരവധി രേഖകളും മുദ്രപത്രങ്ങളും പിടിച്ചെടുത്തു. നിക്ഷേപകനായ നീലേശ്വരം പുതുക്കൈയിലെ പവിത്രന്‍ നമ്പ്യാരുടെ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത നീലേശ്വരം പൊലിസ് കോടതി നിര്‍ദേശപ്രകാരമാണ് പൂട്ടിക്കിടന്ന നീലേശ്വരം ബ്രാഞ്ച് റെയ്ഡ് ചെയ്ത് വിലപ്പെട്ട രേഖകള്‍ പിടിച്ചെടുത്തത്.
രാവിലെ പത്തു മുതല്‍ വൈകീട്ട് അഞ്ചു മണിവരെ പരിശോധിക്കാനാണ് ഹൊസ്ദുര്‍ഗ് ഒന്നാം ക്ലാസ് മജിസ്ട്രേറ്റ് (രണ്ട് ) കോടതി നീലേശ്വരം പൊലിസിന് അനുമതി നല്‍കിയത്.
പുതുക്കൈ സ്വദേശിനി സുനിത, ഇവരുടെ ഭര്‍ത്താവ് ശേഖരന്‍, പത്മനാഭന്‍ എന്നിവരും സ്ഥാപനത്തിനെതിരേ നീലേശ്വരം പൊലിസില്‍ പരാതി നല്‍കിയിരുന്നു. ചതുരക്കിണര്‍ സ്വദേശിനിയായ സിഗ്സിന്റെ ഏജന്റ് പ്രസന്നയാണ് ഇവരെ നിക്ഷേപകരാക്കിയത്.
ഈ കേസില്‍ പ്രസന്ന പ്രധാന സാക്ഷിയാണ്. ഇവര്‍ മുഖേന മാത്രം പത്തു ലക്ഷത്തിലേറെ രൂപയുടെ നിക്ഷേപമാണ് സിഗ്സില്‍ നടത്തിയിട്ടുളളത്.
കോടതി നിയോഗിച്ച ഗസറ്റഡ് റാങ്കിലുള്ള ഉദ്യോഗസ്ഥനായ ഹൊസ്ദുര്‍ഗ് സബ് രജിസ്ട്രാര്‍ കെ.എന്‍ ശ്രീകണ്ഠന്റെ സാന്നിധ്യത്തിലാണ് റെയ്ഡ് നടന്നത്. അതിനിടെ ഡയരക്ടര്‍മാര്‍ ജയിലിലാകുകയും സ്ഥാപനത്തിന്റെ വിവിധ ബ്രാഞ്ചുകളില്‍ ഏജന്റുമാരെ ഉപയോഗിച്ച് വ്യാപകമായി നിക്ഷേപം സ്വീകരിച്ചതായും വിവരമുണ്ട്.
കഴിഞ്ഞദിവസം മലയോരമേഖലയിലെ പരപ്പയില്‍ പ്രവര്‍ത്തിച്ചു വന്നിരുന്ന സ്ഥാപനത്തിന്റെ ശാഖ അടച്ചിടുകയും നിക്ഷേപകരും ഏജന്റുമാരും വെള്ളരിക്കുണ്ട് പൊലിസില്‍ പരാതി ഉന്നയിച്ചതിന്റെ അടിസ്ഥാനത്തില്‍ ഡയറക്ടര്‍മാരും കോട്ടയം സ്വദേശികളുമായ രാജീവ് മേലത്ത് , ബൃന്ദ, തളിപ്പറമ്പ് സ്വദേശികളായ കമലാക്ഷന്‍ സുരേഷ് ബാബു പരവനടുക്കം സ്വദേശി കുഞ്ഞിച്ചന്തു എന്നിവര്‍ക്കെതിരേ ഹൊസ്ദുര്‍ഗ് പൊലിസ് കേസെടുത്ത ിരുന്നു.