കൊട്ടാരക്കര: നവാഗതരെ വരവേല്‍ക്കുന്നതിനിടയില്‍ കൊട്ടാരക്കര എസ്.ജി കോളജില്‍ സംഘര്‍ഷം. ഇരുപതോളം വിദ്യാര്‍ഥികള്‍ക്ക് പരുക്കേറ്റു.
ഒന്നാം വര്‍ഷ ബിരുദ വിദ്യാര്‍ഥികള്‍ക്കായി വിവിധ വിദ്യാര്‍ഥി സംഘടനകള്‍ ഒരുക്കിയ സ്വാഗത പരിപാടിയാണ് സംഘര്‍ഷത്തില്‍ കലാശിച്ചത്. കോളജിന് പുറത്തുനിന്ന് എത്തിയവര്‍ കൂടി ചേര്‍ന്നു നടത്തിയ ആക്രമണത്തില്‍ വിവിധ സംഘടനകളില്‍പെട്ട ഇരുപതോളം വിദ്യാര്‍ഥികള്‍ക്ക് പരുക്കേറ്റു. ഇവര്‍ കൊട്ടാരക്കര താലൂക്കാശുപത്രിയില്‍ ചികിത്സ തേടി.
സംഭവത്തില്‍ പ്രതിഷേധിച്ച് ഇന്ന് എ.ബി.വി.പി കൊട്ടാരക്കര നഗര പരിധിയില്‍ പഠിപ്പ് മുടക്കും. ഇന്നലെ രാവിലെ 10 മണിയോടെയാണ് സംഭവം. വിദ്യാര്‍ഥി സംഘടനകളിലേക്ക്് നവാഗത വിദ്യാര്‍ഥികളെ ചേര്‍ക്കുന്നതിനായി കോളജിലെ വിവിധ വിദ്യാര്‍ഥി പ്രതിനിധികള്‍ ഒന്നാം വര്‍ഷ ബിരുദ ക്ലാസുകളില്‍ എത്തി കുട്ടികളെ വിളിച്ചിറക്കുകയായിരുന്നു. ഇതിനിടയിലുണ്ടായ വാക്കേറ്റമാണ് സംഘര്‍ഷത്തില്‍ കലാശിച്ചത്.
പൊലിസ് ഇടപെട്ടാണ് സംഘര്‍ഷം ശാന്തമാക്കിയത്. കോളജിലും പരിസരത്തും പൊലിസ് നിരീക്ഷണം ശക്തമായി
ട്ടുണ്ട്.