കൊച്ചി: നടി ഷംനകാസിമിനെ ബ്ലാക്ക് മെയില്‍ ചെയ്ത് പണം തട്ടാന്‍ ശ്രമിച്ച കേസില്‍ ഒരാള്‍ കൂടി പിടിയില്‍. വാടാനപ്പള്ളി സ്വദേശി അബൂബക്കര്‍ ആണ് എറണാകുളം നോര്‍ത്ത് പൊലീസ് സ്റ്റേഷനില്‍ കീഴടങ്ങിയത്.ദുബൈയില്‍ ഉള്ള വരന്‍ അന്‍വറിന്റെ അച്ഛനെന്ന വ്യാജേന നടിയുടെ വീട്ടിലെത്തിയത് അബൂബക്കര്‍ ആയിരുന്നു.ഇതോടെ കേസില്‍ പൊലീസ് പിടിയിലായവരുടെ എണ്ണം ആറായി.

കേസില്‍ മറ്റൊരു പ്രതിയും ഇന്ന് പൊലീസിന്റെ പിടിയിലായി. കോടതിയില്‍ കീഴടങ്ങാനെത്തിയ പ്രതിയെ പൊലീസ് കസ്റ്റഡിയിലെടുക്കുകയായിരുന്നു. തൃശ്ശൂര്‍ സ്വദേശി അബദുള്‍ സലാമിനെയാണ് ജില്ലാ സെഷന്‍സ് കോടതിയില്‍ നിന്ന് നോര്‍ത്ത് പൊലീസ് കസ്റ്റഡിയിലെടുത്തത്.

അതേ സമയം പ്രതികളുടെ ഫോട്ടോ കഴിഞ്ഞ ദിവസം പുറത്തുവന്നതോടെയാണ് കൂടുതല്‍പേര്‍ പരാതിയുമായി പൊലീസിനെ ബന്ധപ്പെട്ടത്. ആലപ്പുഴ സ്വദേശിയായ നടി, കൊച്ചിയിലുള്ള ഒരു മോഡല്‍ എന്നിവരുള്‍പ്പെടെ മൂന്ന് യുവതികളാണ് പരാതി നല്‍കിയത്. ഇവരെക്കൂടാതെ അഞ്ചുപേര്‍ക്കൂടി പരാതിയുമായി എത്തിയിട്ടുണ്ടെന്നാണ് കമ്മീഷണര്‍ അറിയിച്ചിരിക്കുന്നത്.

പണവും സ്വര്‍ണവും തട്ടി, ലൈംഗിക ചൂഷണം തുടങ്ങിയ പരാതികളാണ് പ്രതികള്‍ക്കെതിരെ ഉള്ളത്. മനുഷ്യക്കടത്ത് അടക്കമുള്ള വകുപ്പുകള്‍ ചുമത്തിയാണ് കേസെടുത്തിരിക്കുന്നത്.കേസുമായി ബന്ധപ്പെട്ട് കാസര്‍കോട് സ്വദേശിയായ ടിക്ടോക്ക് താരത്തെ ബന്ധപ്പെടുമെന്നും കമ്മീഷണര്‍ അറിയിച്ചു.

പ്രതികള്‍ക്ക് സിനിമ മേഖലയുമായി ബന്ധപ്പെട്ട കൂടുതല്‍ ആളുകളുമായി ബന്ധമുണ്ടെന്നാണ് വിവരം. അന്വേഷണത്തിന് പ്രത്യേക സംഘത്തെ നിയോഗിച്ചിട്ടുണ്ട്.