ഇരിക്കൂര്‍: മഴ വീണ്ടും കനത്തുപെയ്തതോടെ ഇരിക്കൂര്‍ പുഴ നിറഞ്ഞൊഴുകി.
താഴ്ന്ന പ്രദേശങ്ങളും പുഴയോര റോഡുകളും തോടുകളും ചെറിയപാലങ്ങളും വെള്ളത്തിനടിയിലായി. പട്ടുവം വാണീവിലാസം എ.എല്‍.പി സ്‌ക്കൂള്‍ റോഡ്, പൂഞ്ഞിടുക്ക് നിടുവള്ളൂര്‍ പുഴക്കര റോഡ്, ആയിപ്പുഴ തീരദേശ റോഡ്, നിടുകുളം, കുയിലൂര്‍ റോഡുകളെല്ലാം വെള്ളത്തില്‍ മുങ്ങി. ഡയനാമോസ് ഗ്രൗണ്ടിനു സമീപത്തെ പാലം ആയിപ്പുഴ മദ്രസ പാലം സൈറ്റ് റോഡിലെ മിനി പാലം, ഡയനാമോസ് എ.എം.ഐ സ്‌ക്കൂള്‍ റോഡ് എന്നിവ വെള്ളത്തില്‍ മുങ്ങി. ഡയനാമോസ് ഗ്രൗണ്ട് മില്ല് , നിലാമുറ്റം, കുട്ടാവ്, ചേടിച്ചേരി, ചൂളിയാട് തോടുകളും കോളോട്, ചേടിച്ചേരി കോട്ടവയല്‍, ചൂളിയാട് വയല്‍, അടുവാപ്പുറം വയല്‍, കൊടോളിപ്രം ,നിടുകുളം എന്നിവിടങ്ങളിലെ വയലുകളെല്ലാം വെള്ളത്തിലായി.
പ്രദേശത്തെ നെല്ല്, നേന്ത്രവാഴ, കപ്പ, ചേന, പച്ചക്കറി എന്നീ കൃഷികള്‍ നശിച്ചു. നിരവധി വീടുകളും വ്യാപാര സ്ഥാപനങ്ങളും വെള്ളപ്പൊക്ക ഭീഷണിയിലാണ്. ഇരിട്ടി തളിപ്പറമ്പ് സംസ്ഥാന പാതയിലും നിരവധി സ്ഥലങ്ങളില്‍ വെള്ളം കയറിയിട്ടുണ്ട്.