നെടുങ്കണ്ടം: പട്ടം കോളനിക്ക് ആവേശമായി മാറി ഹാഫ് മാരത്തോണ്‍. വിവിധ മേഖലകളില്‍ നിന്നുള്ള നിരവധി പേരാണ് മാരത്തോണില്‍ അണിനിരന്നത്. ഹൈറേഞ്ചിന്റെ ആഘോഷമായി മാറുകയായിരുന്നു പരിപാടി.
ഹൈറേഞ്ചിലെ വിനോദ സഞ്ചാര മേഖലയ്ക്ക് വന്‍കുതിച്ചു ചാട്ടം പകരാന്‍ നെടുങ്കണ്ടത്തു നിന്ന് രാമക്കല്‍മേട്ടിലേക്കാണ് ഹാഫ് മാരത്തോണ്‍ സംഘടിപ്പിച്ചത്. നെടുങ്കണ്ടം പൗരാവലിയും ജനമൈത്രി പൊലിസും സംയുക്തമായി സംഘടിപ്പിച്ച ഹാഫ് മാരത്തണ്‍ നെടുങ്കണ്ടം പഞ്ചായത്ത് സ്‌റ്റേഡിയത്തില്‍ ചലച്ചിത്രതാരം ജാഫര്‍ ഇടുക്കി ഫ്‌ളാഗ് ഓഫ് ചെയ്തു. രാമക്കല്‍മേട് ടൂറിസം വികസന സാധ്യതകള്‍ പ്രയോജനപ്പെടുത്തുക, യുവാക്കളില്‍ ലഹരി ഉപയോഗത്തിന്റെ ദൂഷ്യ വശങ്ങളെക്കുറിച്ച് ബോധവത്ക്കരണം എന്നീ ലക്ഷ്യങ്ങള്‍ ഉള്‍ക്കൊണ്ടാണ് മാരത്തണ്‍ സംഘടിപ്പിച്ചത്.
രാമക്കല്‍മേട്ടില്‍ നടന്ന പൊതുസമ്മേളനം മന്ത്രി എം എം മണി ഉദ്ഘാടനം ചെയ്തു. അഡ്വ. ജോയ്‌സ് ജോര്‍ജ് എം.പി അധ്യക്ഷത വഹിച്ചു. ജില്ലാ കലക്ടര്‍ ജി ആര്‍ ഗോകുല്‍, ജില്ലാ പൊലിസ് മേധാവി കെ ബി വേണുഗോപാല്‍, കട്ടപ്പന ഡിവൈഎസ്പി എന്‍ സി രാജ്‌മോഹന്‍, ത്രിതല പഞ്ചായത്ത് പ്രസിഡന്റുമാര്‍, രാഷ്ട്രീയ സാമൂഹിക രംഗങ്ങളിലെ പ്രമുഖര്‍  പങ്കെടുത്തു.