പുതുക്കാട്: തോട്ടം വനം മേഖലയുടെ പ്രധാന ആശ്രയമായ പുതുക്കാട് റെയില്‍വേ സ്റ്റേഷന്‍ മുഖം മിനുക്കുന്നു.
കേച്ചേരി വിദ്യ എന്‍ജിനീയറിങ് കോളജിലെ എന്‍.എസ്.എസ് യൂനിറ്റിന്റെ നേതൃത്വത്തിലാണ് റെയില്‍വേ സ്റ്റേഷന്‍ സൗന്ദര്യവല്‍ക്കരണം നടത്തുന്നത്.
ടെക്‌നിക്കല്‍ സെല്ലിലെ വളന്റിയര്‍മാരും അമ്പത് എന്‍.എസ്.എസ് സന്നദ്ധ പ്രവര്‍ത്തകരുമാണ് പദ്ധതി പ്രവര്‍ത്തനങ്ങള്‍ക്ക് നേതൃത്വം നല്‍കുന്നത്.
കാടുപിടിച്ചു കിടന്ന പ്ലാറ്റ് ഫോം ശുചീകരിച്ച കുട്ടികള്‍ സ്റ്റേഷനില്‍ പലയിടങ്ങളിലായി ചവറ്റുകുട്ടകള്‍ സ്ഥാപിച്ചു.
പുതുക്കാട് റെയില്‍വേ സ്റ്റേഷനിലെ ജീവനക്കാരും ട്രയിന്‍ പാസഞ്ചേഴ്‌സ് അസോസിയേഷനും സംയുക്തമായാണ് സ്റ്റേഷനിലെ സൗന്ദര്യവല്‍ക്കരണം പദ്ധതിക്ക് നേതൃത്വം നല്‍കുന്നത്.
പദ്ധതിയുടെ ഭാഗമായി നടന്ന പ്ലാറ്റ്‌ഫോം ശുചീകരണത്തിന്റെ ഉദ്ഘാടനം പുതുക്കാട് ഗ്രാമപഞ്ചായത്ത് പ്രസിഡന്റ് അമ്പിളി ശിവരാജന്‍ നിര്‍വഹിച്ചു.
ട്രയിന്‍ പാസഞ്ചേഴ്‌സ് അസോസിയേഷന്‍ പ്രസിഡന്റ് വിജയകുമാര്‍ പുതുക്കാട്ടില്‍ അധ്യക്ഷനായി. സ്റ്റേഷന്‍ മാസ്റ്റര്‍ ഹരികൃഷ്ണന്‍, സെക്രട്ടറി അരുണ്‍ ലോഹിതാക്ഷന്‍,ജോയിന്റ് സെക്രട്ടറി ലിംസന്‍ പല്ലന്‍, ട്രഷറര്‍ വി വിജിന്‍ വേണു ,ജോണ്‍ ചെവിടന്‍ സംസാരിച്ചു.
രണ്ട് ദിവസങ്ങളായി നീണ്ടു നില്‍ക്കുന്ന ശുചീകരണ പ്രവര്‍ത്തനങ്ങളില്‍ അമ്പതോളം എന്‍.എസ്.എസ് വളന്റിയര്‍മാരാണ് പങ്കെടുക്കുന്നത്.