തിരുവനന്തപുരം: അവധിക്കാലം വിജ്ഞാനത്തിന്റെയും വിനോദത്തിന്റെയും ഉത്സവമാക്കാനായി കനകക്കുന്ന് ഒരുങ്ങുന്നു. ഏപ്രില്‍ അഞ്ചുമുതല്‍ 15 വരെ തിരുവനന്തപുരം പ്രസ്‌ക്ലബ് സംഘടിപ്പിക്കുന്ന 'കനകോത്സവ'മാണ് വമ്പന്‍ ആഘോഷങ്ങളൊരുക്കി കാണികളെ കാത്തിരിക്കുന്നത്. നഗരസഭയുടെയും സിസയുടെയും സഹകരണത്തോടെയാണ് പരിപാടി. നൂറ്റാണ്ടിന്റെ ചരിത്രാഖ്യാനമായ ദേശീയ മാധ്യമ എക്‌സിബിഷന്‍ ഏപ്രില്‍ അഞ്ചിന് വൈകിട്ട് ആറ് മണിക്ക് ഗവര്‍ണര്‍ പി. സദാശിവം ഉദ്ഘാടനം ചെയ്യും. സിനിമാ താരങ്ങളുടെ നൃത്തോത്സവം, ദേശീയ പക്ഷിമൃഗ പ്രദര്‍ശനം, ചക്ക മഹോത്സവം, മാമ്പഴ ഫെസ്റ്റ്, വാഴ മഹോത്സവം, അലങ്കാര മല്‍സ്യ പ്രദര്‍ശനം, മെഡിക്കല്‍ എക്‌സ്‌പോ, ബാലഭാസ്‌ക്കര്‍ സ്മാരക ബാന്‍ഡ് ഡി.ജെ മല്‍സരങ്ങള്‍, ദേശീയ ഫോട്ടോഗ്രാഫി മല്‍സരം എന്നിങ്ങനെ എണ്ണിയാലൊടുങ്ങാത്ത പരിപാടികളാണ് കനകോത്സവത്തിന്റെ ഭാഗമായി സംഘടിപ്പിച്ചിരിക്കുന്നത്. രണ്ടു ലക്ഷത്തോളം കാണികള്‍ എത്തുമെന്നാണ് സംഘാടകരുടെ പ്രതീക്ഷ. വിവിധ ദിവസങ്ങളിലായി മന്ത്രിമാര്‍, രാഷ്ട്രീയ നേതാക്കള്‍, സാമൂഹികസാംസ്‌കാരിക രംഗത്തെ പ്രമുഖര്‍, സിനിമാതാരങ്ങള്‍ എന്നിവര്‍ മേള സന്ദര്‍ശിക്കും. ഇന്ത്യയുടെ ചരിത്രത്തോടൊപ്പം സഞ്ചരിച്ച ആകാശവാണിയുടെയും വി.എസ്.എസ്.സിയുടെയും സ്റ്റാളുകള്‍ വ്യത്യസ്തത പുലര്‍ത്തും. ഇന്ത്യന്‍ സൈന്യത്തിന്റെ പ്രതിരോധ സംവിധാനങ്ങള്‍ വിശദമാക്കുന്ന ഇന്ത്യന്‍ ആര്‍മിയുടെ സ്റ്റാള്‍, തിരുവനന്തപുരം മെഡിക്കല്‍ കോളജും ശ്രീ ചിത്ര മെഡിക്കല്‍ സെന്ററും അണിയിച്ചൊരുക്കുന്ന മെഡിക്കല്‍ എക്‌സ്‌പോ, ശാന്തിഗിരി പവലിയന്‍ എന്നിവ കാഴ്ചക്കാര്‍ക്കു പുതിയ അനുഭവമാകും. ഇതിനു പുറമേ മാധ്യമ ഫോട്ടോ കാര്‍ട്ടൂണ്‍ എക്‌സിബിഷനുകളും ഒരുക്കുന്നുണ്ട്. പൊലിസ് ഡിപ്പാര്‍ട്ട്‌മെന്റിന്റെ സൈബര്‍ ഡോം ഒരുക്കുന്ന സ്റ്റാള്‍ സൈബര്‍ കുറ്റകൃത്യങ്ങളെക്കുറിച്ചും അവയുടെ വ്യാപ്തിയെക്കുറിച്ചും വിശദമാക്കും. പോലീസ് മ്യൂസിയം പുനരാവിഷ്‌കരിക്കും. നിയമസഭ, ഇലക്ഷന്‍ കമ്മീഷന്‍, ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍സ്, ദുരന്ത നിവാരണ അതോറിറ്റി, വനം, ഫയര്‍ ആന്‍ഡ് റെസ്‌ക്യൂ, എക്‌സൈസ്, പുരാവസ്തു, തപാല്‍ തുടങ്ങിയ വിഭാഗങ്ങളുടെ പവലിയനും അറിവും ആനന്ദവും പകര്‍ന്നു നല്‍കുന്നതാകും. വാര്‍ത്താവിനിമയ സംവിധാനങ്ങളില്‍ കലാകാലങ്ങളിലുണ്ടായ വിപ്ലവകരമായ മാറ്റങ്ങള്‍ പ്രതിഫലിപ്പിക്കുന്ന ബി.എസ്.എന്‍.എല്‍ പവലിയന്‍ മറ്റൊരാകര്‍ഷണമാവും.
വര്‍ത്തമാന പത്രങ്ങള്‍ അച്ചടിച്ചിരുന്ന കല്ലച്ച് മുതല്‍ ആധുനിക അച്ചടി സംവിധാനങ്ങള്‍ വരെ പരിചയപ്പെടുത്തുന്ന മാധ്യമ ചരിത്ര പ്രദര്‍ശനം, അഖിലേന്ത്യാ ഫോട്ടോഗ്രഫി മത്സരം, കാലത്തിന്റെ സ്പന്ദനമുള്‍ക്കൊള്ളുന്ന കലാവിരുന്നുകള്‍ എന്നിങ്ങനെയുള്ള പരിപാടികളാണ് അണിയറയില്‍ ഒരുങ്ങുന്നത്.