മട്ടന്നൂര്‍: മട്ടന്നൂര്‍ പൊലിസ് സ്റ്റേഷന്‍ കോംപൗണ്ടില്‍ പിടിച്ചിട്ടിരിക്കുന്ന വാഹനങ്ങള്‍ തുരുമ്പെടുത്തു നശിക്കുന്നു. നൂറിലധികം വാഹനങ്ങളാണു തുരുമ്പെടുത്ത് ദ്രവിച്ചു നശിച്ചുകൊണ്ടിരിക്കുന്നത്.
വര്‍ഷങ്ങള്‍ക്കു മുന്‍പ് സ്പിരിറ്റ്, മണല്‍ തുടങ്ങിയവ കടത്തുമ്പോള്‍ പിടികൂടിയതും അപകടങ്ങളില്‍പ്പെട്ട് ഉപേക്ഷിച്ച വാഹനങ്ങളുമാണു സ്റ്റേഷന്‍ കോംപൗണ്ടില്‍ നശിക്കുന്നത്.
ലോറി, കാര്‍, ജീപ്പ്, ബൈക്ക് തുടങ്ങിയ നൂറുകണക്കിനു വാഹനങ്ങളാണു ഉടമസ്ഥര്‍ക്കു വിട്ടുനല്‍കുകയോ ലേലമോ ചെയ്യാതെ നശിക്കുന്നത്. സ്റ്റേഷന്‍ കോംപൗണ്ട് കാടുകയറി മൂടിയതിനാല്‍ വാഹനങ്ങളിലും കോംപൗണ്ടിലും ഇഴജന്തുക്കളുടെ ശല്യവും വര്‍ധിച്ചിട്ടുണ്ട്.
മാസങ്ങള്‍ക്കു മുന്‍പ്് സി.ഐ ഓഫിസില്‍ പെരുമ്പാമ്പ് കയറിയ സംഭവമുണ്ടായിരുന്നു.
വര്‍ഷങ്ങളായി പിടിച്ചിട്ടിരിക്കുന്ന വാഹനങ്ങള്‍ ലേലം ചെയ്യാനുള്ള നടപടി സ്വീകരിക്കണമെന്നും കോംപൗണ്ടിലെ കാട് വെട്ടിത്തെളിക്കണമെന്നുമാണു ജനങ്ങളുടെ ആവശ്യം.