അന്തിക്കാട് (തൃശൂര്‍): താന്ന്യത്ത് കാറിലെത്തിയ ഗുണ്ടാസംഘം യുവാവിനെ വെട്ടിക്കൊന്നു. താന്ന്യം കുറ്റിക്കാട്ട് സുരേഷിന്റെ മകന്‍ ആദര്‍ശ് (മക്കു-29) ആണ് കൊല്ലപ്പെട്ടത്. ഇന്നലെ രാവിലെ പത്തോടെ മാരകായുധങ്ങളുമായെത്തിയ നാലംഗ സംഘമാണ് ആക്രമണം നടത്തിയത്. 

കാറിലെത്തിയ സംഘം വീടിനുസമീപത്തെ ചായക്കടയിലിരിക്കുകയായിരുന്ന യുവാവിനെ വിളിച്ചിറക്കിയശേഷം വെട്ടുകയായിരുന്നു. പരുക്കേറ്റ യുവാവിനെ തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ഉച്ചയ്ക്കുശേഷം മരിച്ചു.

 പ്രദേശത്തെ ഗുണ്ടാസംഘമാണ് ആക്രമണത്തിന് പിന്നിലെന്നാണ് സൂചന. കൊല്ലപ്പെട്ട യുവാവ് നിരവധി ക്രിമിനല്‍ കേസുകളില്‍ പ്രതിയും ഗുണ്ടാ ലിസ്റ്റില്‍പ്പെട്ടയാളുമാണെന്ന് പൊലിസ് പറഞ്ഞു. 2018ലെ വിഷുദിനത്തിലും ആദര്‍ശിന് നേരെ ആക്രമണമുണ്ടായിരുന്നു. പ്രതികള്‍ ഉപയോഗിച്ചുവെന്ന് കരുതുന്ന കാര്‍ ചെന്ത്രാപ്പിന്നിയില്‍ നിന്ന് കണ്ടെത്തി. സി.പി.എം ലോക്കല്‍ കമ്മിറ്റി അംഗവും മുന്‍ പഞ്ചായത്തംഗവുമായ മായ സുരേഷാണ് ആദര്‍ശിന്റെ മാതാവ്.