ഗുരുവായൂര്‍: മദ്യത്തിന്റെയും മയക്കുമരുന്നിന്റെയും ഉപയോഗം മൂലം ഉണ്ടാകുന്ന ദുരന്തഫലങ്ങള്‍ ചൂണ്ടിക്കാണിച്ചുകൊണ്ട് മമ്മിയൂര്‍ എല്‍.എഫ്. ഹയര്‍ സെക്കന്‍ഡറി ഗൈഡിങ് യൂനിറ്റിന്റെ നേതൃത്വത്തില്‍ ബോധവല്‍ക്കരണവും വാഹനപ്രചാരണജാഥയും നടന്നു.
ചാവക്കാട് റേഞ്ച് അസിസ്റ്റന്റ് എക്‌സൈസ് ഇന്‍സ്‌പെക്ടര്‍ ആര്‍.എം അബ്ദുള്‍ജമാല്‍ ബോധവല്‍ക്കരണ ക്ലാസ് എടുക്കുകയും വാഹനപ്രചാരണജാഥയുടെ ഫ്‌ളാഗ് ഓഫ് കര്‍മ്മം നിര്‍വ്വഹിക്കുകയും ചെയ്തു. പാലയൂര്‍ പള്ളിയങ്കണം, എല്‍.എഫ് കോളജ്, ചാവക്കാട് ഗവ. ഹയര്‍ സെക്കന്‍ഡറി സ്‌കൂള്‍, ഗുരുവായൂര്‍ ശ്രീകൃഷ്ണ ഹയര്‍ സെക്കന്‍ഡറി സ്‌കൂള്‍, എല്‍.എഫ് ഹൈസ്‌കൂള്‍, എല്‍.എഫ് യു.പി സ്‌കൂള്‍ എന്നിവിടങ്ങളില്‍ മൂകാഭിനയം, പ്രഭാഷണം പ്രതിജ്ഞയെടുക്കല്‍ എന്നിവ വഴി ബോധവല്‍ക്കരണം നടത്തി. സി. ഫോണ്‍സി മരിയ, ടി.കെ പരമേശ്വരന്‍, മുരളീധരന്‍ കൈമള്‍, സി.ജ്യോതിസ്സ്, മാക്‌സി മാത്യൂസ് നേതൃത്വം നല്‍കി.