കിഴിശ്ശേരി: വിളയില്‍ പറപ്പൂരിലെ കൊണ്ടോട്ടി ഗവ. കോളജ് എന്‍.എസ്.എസ് വിദ്യാര്‍ഥികളുടെ നേതൃത്വത്തില്‍ നിര്‍മിക്കുന്ന വീട് നിര്‍മാണം തുടങ്ങി. രോഗബാധിതനായി കിടപ്പിലായ ഓമാനൂര്‍ തടപ്പറമ്പ് താഴെപീടികയിലെ ബീരാന്‍ കുട്ടിയുടെ വീടെന്ന സ്വപ്നം സാക്ഷാല്‍ക്കരിക്കാനാണ് ഗവ. കോളജിലെ എന്‍.എസ്.എസ് വിദ്യാര്‍ഥികള്‍ മുന്നിട്ടിറങ്ങുന്നത്.
സംസ്ഥാന സര്‍ക്കാരിന്റെ ലൈഫ് മിഷനുമായി ചേര്‍ന്നാണ് കാലിക്കറ്റ് സര്‍വകലാശാലയുടെ 'അഭയം' ഭവന പദ്ധതി എന്‍.എസ്.എസ് വിദ്യാര്‍ഥികള്‍ നടപ്പാക്കുന്നത്. കോളജിന്റെ പരിസര പ്രദേശങ്ങളില്‍ വീടില്ലാത്ത നിര്‍ധനരെ കണ്ടെത്തി അവരുടെ വീടെന്ന സ്വപ്നം യാഥാര്‍ഥ്യമാക്കുകയാണ് എന്‍.എസ്.എസ് യൂനിറ്റിന്റെ നേതൃത്വത്തില്‍ വിദ്യാര്‍ഥികള്‍ ചെയ്യുന്നത്.
വിദ്യാര്‍ഥികളുടെ നേതൃത്വത്തില്‍ നിര്‍മിക്കുന്ന നാലാമത്തെ വീടാണിത്. വീടിന്റെ തറ കീറല്‍ മുതല്‍ പടവ്, കോണ്‍ക്രീറ്റ്, തേപ്പ്, പെയ്ന്റിങ് തുടങ്ങി എല്ലാ ജോലികളും വിദ്യാര്‍ഥികള്‍ തന്നെയാണ് ചെയ്യുക.
അത്തരം ജോലികള്‍ ചെയ്യുന്ന വിദ്യാര്‍ഥികള്‍ ഓരോ ഘട്ടത്തിലും നേതൃത്വം നല്‍കും. വീടിന്റെ തറ കീറലിന്റെ ഉദ്ഘാടനം പ്രോഗ്രാം ഓഫിസറും എന്‍.എസ്.എസ് ജില്ലാ കോഡിനേറ്ററുമായ പ്രൊഫ. എം.പി സമീറ ഉദ്ഘാടനം ചെയ്തു.