കോഴിക്കോട്: പ്രവര്‍ത്തകരുടെ പ്രതീക്ഷക്ക് രാഹുല്‍ മങ്ങലേല്‍പ്പിച്ചില്ല. മണിക്കൂറുകളോളം തന്നെ ഒരു നോക്ക് കാണാന്‍ കാത്തു നിന്ന പ്രവര്‍ത്തകരിലേക്ക് സുരക്ഷാ വലയങ്ങള്‍ മറികടന്ന് രാഹുല്‍ ഇറങ്ങി വന്നു. സംഘത്തിലുണ്ടായിരുന്ന കുട്ടിയെ എടുത്തുയര്‍ത്തി, പ്രവര്‍ത്തകര്‍ക്ക് കൈകൊടുത്തു. ചിലര്‍ ഈ സമയം പ്രിയ നേതാവിന്റെ ഒപ്പമുള്ള സെല്‍ഫിയും എടുത്തു.
വയനാട്ടിലേക്ക് പോകാനായി ഗസ്റ്റ് ഹൗസില്‍നിന്ന് ഇറങ്ങിയ രാഹുല്‍ ഗാന്ധി വഴിയോരത്തെ പ്രവര്‍ത്തകരുടെ ആവേശം കണ്ട് വാഹനം നിര്‍ത്തി ഇറങ്ങിയാണ് പ്രവര്‍ത്തകരെ അഭിവാദ്യം ചെയ്തത്. വെസ്റ്റ്ഹില്‍ ഗവ. ഗസ്റ്റ് ഹൗസില്‍നിന്ന് അതീവ സുരക്ഷയില്‍ വിക്രം മൈതാനിയിലേക്ക് പോകുന്നതിനിടെയാണ് രാഹുല്‍ സുരക്ഷാ ഉദ്യോഗസ്ഥരെ അമ്പരപ്പിച്ചുകൊണ്ട് പ്രവര്‍ത്തകരെ കണ്ടയുടന്‍ വാഹനം നിര്‍ത്താന്‍ ആവശ്യപ്പെട്ടതും ഡോര്‍ തുറന്ന് പുറത്തിറങ്ങിയതും.  പുറത്തിറങ്ങിയ രാഹുല്‍ ചില പ്രവര്‍ത്തകര്‍ക്ക്് കൈയും കൊടുത്തു. ഒട്ടേറെ പേര്‍ കൈകൊടുക്കാനായി വാഹനത്തെ വളഞ്ഞു. ചിലര്‍ കിട്ടിയ സമയം കൊണ്ട് സെല്‍ഫിയും എടുത്തു. സുരക്ഷാ ചുമതലയുള്ള എസ്.പി.ജിക്കാര്‍ അല്‍പസമയത്തിന് ശേഷം രാഹുലിനെ വാഹനത്തില്‍ കയറ്റുകയായിരുന്നു. രാഹുലിനൊപ്പം പ്രിയങ്കയും വാഹനത്തിലുണ്ടായിരുന്നു. മറ്റൊരു വാഹനത്തില്‍ പ്രതിപക്ഷ നേതാവ് രമേശ് ചെന്നിത്തലയും കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനും അനുഗമിച്ചിരുന്നു.
രാഹുലിനെ കാണാന്‍ കനത്ത സുരക്ഷാ വലയത്തിനുള്ളലാണെങ്കിലും രാവിലെ മുതല്‍ വെസ്റ്റ്ഹില്ലിലെ ഗവ. ഗസ്റ്റ് ഹൗസില്‍ നിരവധി പ്രവര്‍ത്തകര്‍ എത്തിയിരുന്നു. കഴിഞ്ഞ ദിവസം രാത്രി 10.30 ഓടെയാണ് രാഹുലും പ്രിയങ്കയും വെസ്റ്റ്ഹില്ലിലെ ഗവ. ഗസ്റ്റ് ഹൗസില്‍ എത്തിയത്.