ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുനൈറ്റഡിന് മികച്ച ജയം. ബേണ്‍മൗത്തിനെ 5-2 എന്ന സ്‌കോറിനാണ് യുനൈറ്റഡ് പരാജയപ്പെടുത്തിയത്. ഒരിടവേളക്ക് ശേഷം യുനൈറ്റഡ് വീണ്ടും പ്രതാപത്തിലേക്ക് തിരിച്ചുവരുന്ന കാഴ്ചയായിരുന്നു കഴിഞ്ഞ ദിവസം കണ്ടത്. പരുക്ക് മാറി തിരിച്ചെത്തി പോള്‍ പോഗ്ബയും ബ്രൂണോ ഫെര്‍ണാണ്ടസുമായിരുന്നു ഇന്നലെ യുനൈറ്റഡിനെ നിയന്ത്രിച്ചത്. മാസന്‍ ഗ്രീന്‍വുഡ് (29), (54), മാര്‍ക്കസ് റാഷ്‌ഫോര്‍ഡ് (35), അന്തോണി മാര്‍ഷ്യല്‍ (47), ബ്രൂണോ ഫെര്‍ണാണ്ടസ് (59) എന്നിവരാണ് യുനൈറ്റഡിന് വേണ്ടി ഗോള്‍ നേടിയത്. 

ഇതോടെ 33 മത്സരത്തില്‍ നിന്ന് യുനൈറ്റഡിന് 55 പോയിന്റായി. മറ്റൊരു മത്സരത്തില്‍ എതിരില്ലാത്ത മൂന്ന് ഗോളിന് ലെസ്റ്റര്‍ സിറ്റി ക്രിസ്റ്റല്‍ പാലസിനെ തകര്‍ത്തു. എതിരില്ലാത്ത ഒരു ഗോളിന് ബ്രൈറ്റണ്‍ - നോര്‍വിച്ച് സിറ്റിയെ പരാജയപ്പെടുത്തി. ഇന്ന് നടക്കുന്ന മത്സരത്തില്‍ ബേണ്‍ലി ഷെഫീല്‍ഡ് യുനൈറ്റഡിനെ നേരിടും. 6.45ന് നടക്കുന്ന മത്സരത്തില്‍ ന്യൂകാസില്‍ യുനൈറ്റഡ് വെസ്റ്റ് ഹാമിനെ നേരിടും. രാത്രി 9ന് നടക്കുന്ന മത്സരത്തില്‍ ലിവര്‍പൂള്‍ ആസ്റ്റണ്‍വില്ലയെ നേരിടും. രാത്രി 11.30ന് സതാംപ്ടണും മാഞ്ചസ്റ്റര്‍ സിറ്റിയും തമ്മിലാണ് മത്സരം.