ന്യൂഡല്‍ഹി: മദ്യപിച്ച് കാറോടിച്ചയാള്‍ വഴിയാത്രക്കാരിയെ ഇടിച്ചിട്ടു ശരീരത്തിലൂടെ കാറ് കയറ്റി കടുന്നുകളഞ്ഞു. സംഭവത്തില്‍ 60 കാരിക്ക് ഗുരുതര പരുക്കേറ്റു. ഇവരെ ആശുപത്രിയില്‍ പ്രവേശിപ്പിച്ചിരിക്കുകയാണ്. പ്രതിയെ പോലിസ് അറസ്റ്റ് ചെയ്തു. സംഭവത്തിന്റെ സി.സി.ടി.വി ദൃശ്യങ്ങള്‍ പുറത്തുവന്നു.
ഖാസിപുരിലെ ചില്ല മേഖലയിലെ ഇടുങ്ങിയ വീതികുറഞ്ഞ റോഡില്‍ വച്ചാണ് സംഭവം.
അമിതവേഗത്തില്‍ വന്ന കാര്‍ സ്ത്രീയെ ഇടിച്ചുതെറിപ്പിക്കുന്നത് ദൃശ്യങ്ങളില്‍ വ്യക്തമാണ്. അപകടം നടന്ന സ്ഥലത്തേക്ക് ആളുകള്‍ ഓടിക്കൂടുകയും വാഹനം തടയാന്‍ ശ്രമിക്കുകയും ചെയ്തപ്പോള്‍ കാര്‍ നിര്‍ത്താതെ സ്ത്രീക്ക് മുകളിലൂടെ ഒടിച്ചുപോവുകയായിരുന്നു. നിലത്തു വീണ സ്ത്രീയെ കാര്‍ ഏതാനും മീറ്റര്‍ വലിച്ചിഴച്ച് കൊണ്ടു പോവുന്നതും കാണാം.
ഭാനു എന്നയാളാണ് അറസ്റ്റിലായത്. മദ്യപിച്ച് അപകടകരമാം വിധത്തില്‍ അമിതവേഗത്തിലായിരുന്നു പ്രതി കാറോടിച്ചതെന്ന് പൊലിസ് പറഞ്ഞു.