ടോക്കിയോ: പടിഞ്ഞാറന്‍ ജപ്പാനില്‍ കനത്ത മഴയെ തുടര്‍ന്നുണ്ടായ വെള്ളപ്പൊക്കത്തിലും മണ്ണിടിച്ചിലിലും മരണസംഖ്യ നൂറ് കടന്നു. 61 പേരെ ഇനിയും കണ്ടെത്താനായിട്ടില്ല. മേഖലയില്‍ വൈദ്യുതിബന്ധം പൂര്‍ണമായും തകര്‍ന്നിരിക്കുകയാണ്.

കഴിഞ്ഞ വ്യാഴാഴ്ച മുതല്‍ മേഖലയില്‍ കനത്ത മഴയാണു വര്‍ഷിച്ചത്. സാധാരണ ജൂലൈ മാസം മൊത്തത്തിലുണ്ടാകുന്ന മഴയുടെ മൂന്നിരട്ടിയാണു കഴിഞ്ഞ അഞ്ചു ദിവസങ്ങളില്‍ മാത്രം പ്രദേശത്തുണ്ടായത്. ഹിരോഷിമ, ഹയോഗോ, നാഗസാക്കി, സാഗ, ടൊട്ടോറി എന്നിവിടങ്ങളിലാണ് കനത്ത മഴ വര്‍ഷിച്ചത്. ഷിക്കോക്കോ ദ്വീപിലെ മോട്ടോയോമ നഗരത്തില്‍ മാത്രം രണ്ടു ദിവസങ്ങള്‍ക്കിടെ 583 മി.മീറ്റര്‍ മഴയാണു പെയ്തത്. ഏതാനും ദിവസങ്ങള്‍ കൂടി മഴ തുടരുമെന്നാണു കാലാവസ്ഥാ നിരീക്ഷണ കേന്ദ്രം നല്‍കുന്ന വിവരം.
മരണസംഖ്യ 114 ആയതായി വാര്‍ത്താ ഏജന്‍സി റോയിട്ടേഴ്‌സ് റിപ്പോര്‍ട്ട് ചെയ്തു. ഹിരോഷിമയിലാണ് കൂടുതല്‍ ആളപായവും നാശനഷ്ടങ്ങളും റിപ്പോര്‍ട്ട് ചെയ്തത്. പൊലിസ്, അഗ്നിശമന സേനാംഗങ്ങള്‍, തീരരക്ഷാസേന അടക്കം 73,000ത്തോളം പേരും 700 ഹെലികോപ്ടറുകളും അടങ്ങുന്ന വന്‍ സംഘമാണു രക്ഷാപ്രവര്‍ത്തനത്തിനു നേതൃത്വം നല്‍കുന്നത്. 1983നു ശേഷം ജപ്പാനിലുണ്ടാകുന്ന ഏറ്റവും വലിയ വെള്ളപ്പൊക്കമാണ് ഇപ്പോള്‍ പടിഞ്ഞാറന്‍ മേഖലയിലുണ്ടാകുന്നത്.
ആളപായത്തിനു പുറമെ നൂറു കണക്കിനു കെട്ടിടങ്ങളും വീടുകളും തകര്‍ന്നടിയുകയും ചെയ്തിട്ടുണ്ട്. ദുരന്തത്തിന്റെ തോത് കൃത്യമായി കണക്കാക്കാനായിട്ടില്ലെന്ന് അധികൃതര്‍ പറഞ്ഞു. സംഭവത്തെ തുടര്‍ന്ന് ജാപ്പനീസ് പ്രധാനമന്ത്രി ഷിന്‍സോ ആബെ വിദേശയാത്ര റദ്ദാക്കി. ബെല്‍ജിയം, ഫ്രാന്‍സ്, സഊദി അറേബ്യ, ഈജിപ്ത് എന്നിവിടങ്ങളില്‍ സന്ദര്‍ശനത്തിനായി ബുധനാഴ്ച പുറപ്പെടാനിരിക്കുകയായിരുന്നു ആബെ.
അതിനിടെ, ജപ്പാന്‍ തലസ്ഥാനമായ ടോക്കിയോയില്‍ ശനിയാഴ്ച വന്‍ ഭൂചലനവുമുണ്ടായിരുന്നു. റിക്ടര്‍ സ്‌കെയിലില്‍ ആറ് തീവ്രത രേഖപ്പെടുത്തിയ ഭൂചലനമാണ് തലസ്ഥാനത്ത് അനുഭവപ്പെട്ടത്.