തിരുവനന്തപുരം: രാഹുല്‍ സി.പി.എമ്മിനെ ശത്രുപക്ഷത്ത് നിര്‍ത്താന്‍ ഉദ്ദേശിച്ചിട്ടില്ലെന്ന് വ്യക്തമാക്കിയിട്ടും ആ സൗജന്യം വേണ്ടെന്ന നിലപാടില്‍ സി.പി.എം. കേരളത്തില്‍ മത്സരിക്കാനെത്തി സി.പി.എമ്മിനെതിരേ ഒന്നും പറയില്ലെന്ന രാഹുല്‍ഗാന്ധിയുടെ പരാമര്‍ശം പരിഹാസ്യമെന്ന മുഖ്യമന്ത്രി പിണറായി വിജയയന്റെ പ്രതികരണമെങ്കില്‍ സി.പി.എമ്മിനെ വിമര്‍ശിക്കാന്‍ രാഹുല്‍ ഗാന്ധിയെ വെല്ലുവിളിച്ചിരിക്കുകയാണ് കോടിയേരി ബാലകൃഷ്ണന്‍.

രാഹുല്‍ ഗാന്ധി സി പി എമ്മിനെതിരെ പറഞ്ഞില്ലെങ്കിലും കോണ്‍ഗ്രസിന്റെ തെറ്റായ നയങ്ങള്‍ സി.പിഎം തുറന്നു കാട്ടുമെന്നും കോടിയേരി ബാലകൃഷ്ണന്‍ വ്യക്തമാക്കി. രാഹുല്‍ഗാന്ധിയുടെ തന്ത്രപരമായ നിലപാട് വലിയ രാഷ്ട്രീയ ചര്‍ച്ചയായി മാറുന്ന സാഹചര്യത്തിലാണ് കോടിയേരിയുടെ പ്രതികരണം.

സി പി എമ്മിനെതിരെ എന്തെങ്കിലുമൊക്കെ പറയാന്‍ വെല്ലുവിളിക്കുന്നെന്നും കോടിയേരി കൂട്ടിച്ചേര്‍ത്തു. രാഹുലിന്റെ സ്ഥാനാര്‍ത്ഥിത്വം കോണ്‍ഗ്രസിന്റെ പാപ്പരത്തമെന്ന് കോടിയേരി ബാലകൃഷ്ണന്‍ ആരോപിച്ചു. കോണ്‍ഗ്രസിനും രാഹുലിനും ഒരു ഷോക്ക് ട്രീറ്റ്‌മെന്റ് കൊടുക്കണമെന്നും വയനാട്ടില്‍ രാഹുല്‍ തോല്‍ക്കുമെന്നും കോടിയേരി ബാലകൃഷ്ണന്‍ പറഞ്ഞു.