നിലമ്പൂര്‍: എലിവിഷമായി കര്‍ഷകര്‍ക്ക് സര്‍ക്കാര്‍ കൃഷിഭവനുകളിലൂടെ നല്‍കുന്നത് നിരോധിത ഉല്‍പന്നങ്ങള്‍. തെരഞ്ഞെടുപ്പ് ചൂടിനിടയിലും സംസ്ഥാനത്തെ മുഴുവന്‍ കൃഷിഭവനുകളിലൂടെ ഇവ കര്‍ഷകര്‍ക്ക് സൗജന്യമായി വിതരണം ചെയ്യുകയാണ്.

സര്‍ക്കാര്‍ നിരോധിച്ച ചുവന്ന ലേബലിലുള്ള എലിവിഷമാണ് ഇത്തരത്തില്‍ വിതരണം ചെയ്തത്. പ്രളയത്തെ തുടര്‍ന്ന് എലികളുടെ ശല്യം വര്‍ധിച്ചിരിക്കുകയാണെന്ന അധികൃതരുടെ സര്‍വേയുടെ അടിസ്ഥാനത്തിലാണ് കൃഷിഭവനുകളിലുടെ നിരോധിതവിഷം അശാസ്ത്രീയമായി വിതരണം ചെയ്തത്. 23,000 രൂപയുടെ എലിവിഷമാണ് ഓരോ കൃഷിഭവനുകളിലും വിതരണം ചെയ്്തത്.
ഇത്തരത്തില്‍ 2,34,44,000 രൂപയുടെ ചുവന്ന അടയാളമുള്ള എലിവിഷമാണ് സംസ്ഥാനത്ത് വിതരണം ചെയ്തത്. ചില ഏജന്‍സികളുമായി ഒത്തുചേര്‍ന്നാണ് ഇവ വിതരണം ചെയ്തതെന്നും ആക്ഷേപമുണ്ട്.
സംസ്ഥാനത്ത് ജൈവകാര്‍ഷികനയം നടപ്പാക്കുന്നതിന്റെ ഭാഗമായി കൂടുതല്‍ കീടനാശിനികളുടെയും വിഷങ്ങളുടേയും ഉപയോഗം നിരോധിച്ചും നിയന്ത്രിച്ചും അഞ്ചുവര്‍ഷം മുന്‍പാണ് കൃഷിവകുപ്പ് ഡയരക്ടര്‍ ഉത്തവിട്ടത്.
ചുവന്ന അടയാളത്തോടുകൂടിയ ചില കീടനാശിനികളുടെയും വിഷപദാര്‍ഥങ്ങളുടേയും ഉപയോഗം പൂര്‍ണമായും നിരോധിച്ചിരുന്നു. കൂടാതെ മഞ്ഞ, നീല ലേബലോടെയുള്ളവയും ചില കളനാശിനികളുടെയും വില്‍പനയും ഉപയോഗവും അത്യാവശ്യ ഘട്ടങ്ങളില്‍ കൃഷി ഓഫിസറുടെ കുറിപ്പടിയുടെ അടിസ്ഥാനത്തില്‍ മാത്രമായി പരിമിതപ്പെടുത്തണമെന്നും പുതിയ ഉത്തരവില്‍ നിര്‍ദേശിച്ചിരുന്നു. ഈ ഉത്തരവ് നിലനില്‍ക്കേയാണ് കൃഷിഭവനുകളിലൂടെ ചുവപ്പ് ലേബലിലുള്ള വിഷം വിതരണം ചെയ്തത്.