പേരാമ്പ്ര: സ്വകാര്യബസില്‍ നിന്ന് തെറിച്ചുവീണ് വിദ്യാര്‍ഥിക്ക് പരുക്ക്. നൊച്ചാട് ഹയര്‍ സെക്കന്‍ഡറി സ്‌കൂള്‍ പത്താം ക്ലാസ് വിദ്യാര്‍ഥി മുളിയങ്ങല്‍ പനമ്പ്ര കണ്ടിയില്‍ സിദ്ദീഖിന്റെ മകന്‍ ആഷിര്‍ സഹലിനാണ് (14) പരുക്കേറ്റത്.
വിദ്യാര്‍ഥിയെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
ഇന്നലെ വൈകിട്ട് 4.30ന് ട്യൂഷന്‍ കഴിഞ്ഞ് വെള്ളിയൂരില്‍ നിന്നു മുളിയങ്ങലിലേക്കു ബസില്‍ കയറിയതായിരുന്നു. സ്റ്റോപ്പില്‍നിന്നു ബസ് എടുത്ത് മിനുട്ടുകള്‍ക്കകം വെള്ളിയൂര്‍ വളവില്‍ വച്ചാണ് അപകടം.
ബസിന്റെ അമിതവേഗതയില്‍ പിറകുവശത്തെ ഡോര്‍ തുറന്നുപോയാണ് വിദ്യാര്‍ഥി തെറിച്ചുവീണത്. കുറ്റ്യാടി-കോഴിക്കോട് റൂട്ടില്‍ ബസുകള്‍ അമിതവേഗതയിലാണു സര്‍വിസ് നടത്തുന്നത്. യാത്രക്കാരെ പല ബസുകളും സ്റ്റോപ്പില്‍ നിന്ന് ഏറെ അകലെ ഇറക്കുന്ന കാഴ്ചകളും നിത്യസംഭവമാണ്. അപകടം വരുത്തിയ കോഴിക്കോട്-കുറ്റ്യാടി റൂട്ടില്‍ സര്‍വിസ് നടത്തുന്ന അജ്‌വ ബസ് പേരാമ്പ്ര പൊലിസ് കസ്റ്റഡിയിലെടുത്തു.