തത്സമയം കാണാന്‍ 50 പേരെയെങ്കിലും കൃഷിഭവനുകളില്‍ എത്തിക്കണമെന്നു നിര്‍ദേശം

യു.എച്ച് സിദ്ദീഖ്

കോട്ടയം: കൊവിഡ് സമ്പര്‍ക്ക വ്യാപന പ്രതിരോധത്തിന് സര്‍ക്കാര്‍ നിയന്ത്രണങ്ങള്‍ കര്‍ശനമാക്കുമ്പോള്‍ 'ഓണത്തിനൊരുമുറം പച്ചക്കറി' പദ്ധതിയുടെ ഉദ്ഘാടനം ആളെക്കൂട്ടി ആഘോഷമാക്കാന്‍ കൃഷിമന്ത്രിയും സംഘവും. 

വീട്ടുവളപ്പില്‍നിന്ന് വിഷരഹിത പച്ചക്കറി ഉല്‍പ്പാദനം ലക്ഷ്യമിട്ടാണ് കൃഷിവകുപ്പ് പദ്ധതി നടപ്പാക്കുന്നത്. പദ്ധതിയുടെ സംസ്ഥാനതല ഉദ്ഘാടനം ഇന്ന് ഉച്ചകഴിഞ്ഞ് 2.30ന് കൃഷിമന്ത്രി വി.എസ് സുനില്‍കുമാര്‍ തന്റെ ഫേസ്ബുക്ക് പേജിലൂടെയാണ് നിര്‍വഹിക്കുന്നത്. ഉദ്ഘാടനം തത്സമയം കാണാന്‍ കര്‍ഷകര്‍ ഉള്‍പ്പടെ 50 പേരെ കൃഷിഭവനുകളില്‍ സംഘടിപ്പിക്കുന്ന ചടങ്ങില്‍ എത്തിക്കണമെന്നാണ് ഡയറക്ടറേറ്റില്‍നിന്ന് ഉദ്യോഗസ്ഥര്‍ക്ക്  വാക്കാല്‍ നല്‍കിയിരിക്കുന്ന നിര്‍ദേശം. വെര്‍ച്വല്‍ ഉദ്ഘാടനം തത്സമയം കൃഷിഭവനുകളിലെ ചടങ്ങില്‍ എല്‍.സി.ഡി പ്രൊജക്ടര്‍ ഉപയോഗിച്ച് സ്‌ക്രീനില്‍ പ്രദര്‍ശിപ്പിക്കണം. സാമൂഹിക അകലം പാലിക്കാനും പൊതുചടങ്ങുകളിലും സമരങ്ങളിലും ആള്‍ക്കൂട്ടങ്ങള്‍ സൃഷ്ടിക്കപ്പെടുന്നത് ഒഴിവാക്കാനും  ട്രിപ്പിള്‍ ലോക്ക്ഡൗണ്‍ ഉള്‍പ്പെടെ സര്‍ക്കാര്‍ തന്നെ കര്‍ശന നിയന്ത്രങ്ങള്‍ നടപ്പാക്കുമ്പോഴാണ് കൃഷിവകുപ്പിന്റെ ഉദ്ഘാടന മാമാങ്കം. കൃഷിഭവനുകളിലെ പരിപാടിക്കു പുറമേ ജില്ല, മണ്ഡലം, ബ്ലോക്ക്, പഞ്ചായത്തുതല ഉദ്ഘാടന പരിപാടികള്‍ക്കും കൃഷി ഡയരക്ടര്‍ ഉത്തരവിലൂടെ നിര്‍ദേശിച്ചിട്ടുണ്ട്. മണ്ഡലംതല ഉദ്ഘാടനങ്ങള്‍ അതത് എം.എല്‍.എമാരുടെ സാന്നിധ്യത്തില്‍ തന്നെ നടത്താനാണ് നിര്‍ദേശം. ജില്ലകളുടെ ചുമതല വഹിക്കുന്ന പ്രിന്‍സിപ്പല്‍ കൃഷി ഓഫിസര്‍, കൃഷി അസി. ഡയരക്ടര്‍, കൃഷി ഓഫിസര്‍മാര്‍ എന്നിവര്‍ക്കാണ് ആളെക്കൂട്ടി പരിപാടി സംഘടിപ്പിക്കേണ്ട ചുമതല. 

കൊവിഡ് സമ്പര്‍ക്ക വ്യാപന ഭീഷണിയുടെ പശ്ചാത്തലത്തില്‍ കര്‍ഷകരെ കൂട്ടി പരിപാടി സംഘടിപ്പിക്കുന്നതിന്റെ പ്രശ്‌നങ്ങള്‍ കൃഷി ഭവന്‍ ജീവനക്കാര്‍ മേലുദ്യോഗസ്ഥരെ ബോധ്യപ്പെടുത്തിയിരുന്നു. തത്സമയ സംപ്രേഷണവും പ്രാദേശിക ഉദ്ഘാടന ചടങ്ങും നിര്‍ബന്ധമായും നടത്തണമെന്നാണ് ഉന്നത ഉദ്യോഗസ്ഥര്‍ നല്‍കിയ നിര്‍ദേശം.