ചങ്ങരംകുളം: വളയംകുളം അസ്സബാഹ് കോളജില്‍ വീണ്ടും സംഘര്‍ഷം. കോളജ് അടച്ചു. കോളജ് പരിസരത്ത് കൊടി തോരണങ്ങളും ചുവരെഴുത്തുകളും നടത്തുന്നതുമായി ബന്ധപ്പെട്ട തര്‍ക്കങ്ങളാണ് സംഘര്‍ഷങ്ങള്‍ക്ക് കാരണം.
രണ്ട് ദിവസം മുന്‍പ് നടന്ന സര്‍വകക്ഷി യോഗത്തില്‍ രാഷ്ട്രീയ പാര്‍ട്ടികളുടെ കൊടിതോരണങ്ങള്‍ കോളജില്‍നിന്ന് നീക്കം ചെയ്യാന്‍ തീരുമാനിച്ചിരുന്നു. എന്നാല്‍ ഒരു വിഭാഗം തീരുമാനം ലംഘിച്ചതാണ് വീണ്ടും സംഘര്‍ഷങ്ങള്‍ക്ക് കാരണം. ചങ്ങരംകുളം പൊലിസെത്തി സംഘര്‍ഷത്തില്‍ ഏര്‍പ്പെട്ടവരെ വിരട്ടിയോടിച്ചു.
കോളജ് കേന്ദ്രീകരിച്ച് രാഷ്ട്രീയത്തിന്റെ പേരില്‍ വര്‍ഷങ്ങളായി വിദ്യാര്‍ഥികളുടെ അഴിഞ്ഞാട്ടമാണ് നടക്കുന്നതെന്ന് നാട്ടുകാര്‍ പരാതിപ്പെട്ടു. നിലവില്‍ സംഘര്‍ഷത്തെ തുടര്‍ന്ന് കോളജ് അടച്ചിട്ടിരിക്കുകയാണ്. കഴിഞ്ഞ തവണ ഇത്തരത്തിലുണ്ടായ സംഘര്‍ഷം സംസ്ഥാന പാതയിലെത്തിയതിനെ തുടര്‍ന്ന് നിരവധി പേര്‍ക്ക് പരുക്കേറ്റിരുന്നു.