കഴക്കൂട്ടം: ആറ്റിങ്ങല്‍ - തിരുവനന്തപുരം ദേശീയപാതയില്‍ ചെമ്പകമംഗലത്ത്  കാറും ബൈക്കും കൂട്ടിയിടിച്ച് രണ്ട് യുവാക്കള്‍ മരിച്ചു. കോരാണി പതിനെട്ടാം മൈല്‍ അരുണ്‍ നിവാസില്‍ ഷണ്‍മുഖന്റെ മകന്‍ സരുണ്‍ (28), കോരാണി കൊടുമ്പാറക്കോണം കല്ലുവിള വീട്ടില്‍ മോഹനന്റെ മകന്‍ വിഷ്ണു (27) എന്നിവരാണ് മരിച്ചത്. മൃതദേഹങ്ങള്‍ തിരുവനന്തപുരം  മെഡിക്കല്‍ കോളജ് ആശുപത്രി മോര്‍ച്ചറിയിലേക്ക് മാറ്റി. 

അമിത വേഗത്തില്‍  കാറിനെ മറികടക്കാന്‍ ശ്രമിക്കവെ മറ്റൊരു കാറില്‍ ബൈക്ക് ഇടിക്കുകയായിരുന്നുവെന്ന് പൊലിസ് പറഞ്ഞു.  സുഹൃത്തുക്കളായ ഇരുവരും ഒരു ബൈക്കില്‍ മംഗലപുരത്ത് നിന്ന് കോരാണിയിലേക്ക് പോകുമ്പോള്‍ കഴിഞ്ഞ ദിവസം രാത്രി പന്ത്രണ്ടോടെയായിരുന്നു അപകടം.  മുന്നില്‍ പോയ മറ്റൊരു വാഹനത്തില്‍ തട്ടിയ ശേഷമാണ് എതിരേ വന്ന കാറുമായി ബൈക്ക്  കൂട്ടിയിടിച്ചത്. ഇടിയുടെ ആഘാതത്തില്‍ റോഡില്‍ തെറിച്ചു വീണ് ഗുരുതരമായി പരുക്കേറ്റ ഇരുവരെയും ഉടന്‍ മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. അപകടത്തില്‍ ബൈക്ക് പൂര്‍ണമായും തകര്‍ന്നു. ചിഞ്ചുവാണ് വിഷ്ണുവിന്റെ ഭാര്യ. ഇരുവരും കെട്ടിട നിര്‍മാണ തൊഴിലാളികളാണ്.