കോട്ടക്കല്‍: ആഴ്ചകളായി കുണ്ടും കുഴിയും നിറഞ്ഞ റോഡ് നന്നാക്കാത്തതില്‍ വിദ്യാര്‍ഥികള്‍ കര്‍മ രംഗത്തിറങ്ങി. കോട്ടക്കല്‍ ടൗണിലെ ഇന്ത്യനൂര്‍ റോഡ് ജങ്ഷനിലാണു ജനമൈത്രി പൊലിസും പുതുപ്പറമ്പു പോളിടെക്‌നിക് കോളജിലെ എന്‍.എസ്.എസ് യൂനിറ്റ് വിദ്യാര്‍ഥികളും റോഡിലെ കുഴികളടച്ചത്. ആഴ്ചകളായി ഈ ഭാഗത്തു കുഴികള്‍ രൂപപ്പെട്ടിട്ട്.
ഇതോടെ ടൗണിലെ ഗതാഗതക്കുരുക്കു ശക്തമാകുകയും ചെയ്തു. ഇതിനിടെ പി.ഡബ്ല്യു.ഡി ഈ ഭാഗത്ത് ഇന്റര്‍ലോക്ക് പതിച്ചെങ്കിലും ഇതിനു സമീപത്തായി വീണ്ടും കുഴികള്‍ രൂപപ്പെടുകയായിരുന്നു.
നഗരസഭ ഇടപെട്ടു താല്‍ക്കാലിക പരിഹാരം കണ്ടെങ്കിലും മഴവെള്ളം ശക്തമായി ഒലിക്കുന്നതിനാല്‍ ശാശ്വത പരിഹാരമായിട്ടില്ല. ഈ ഭാഗത്ത് എത്തുമ്പോള്‍ വാഹനങ്ങള്‍ പതുക്കെപോകുന്നതിനാല്‍ ഗതാഗതക്കുരുക്കു രൂക്ഷമായിരിക്കുകയാണ്.  കഴിഞ്ഞ ദിവസം വിദ്യാര്‍ഥികളും ജനമൈത്രി പൊലിസും സംയുക്തമായ ക്വാറി വേസ്റ്റ് ഉപയോഗിച്ചാണു കുഴിയടച്ചിരിക്കുന്നത്. എന്‍.എസ്.എസ് കോഡിനേറ്റര്‍ സ്പാദിക, കോട്ടക്കല്‍ എസ്.ഐ ആര്‍. വിനോദ, ജനമൈത്രി കോഡിനേറ്റര്‍ നസീര്‍ തിരൂര്‍ക്കാട് എന്നിവര്‍ നേതൃത്വം നല്‍കി.