മങ്കട: അന്താരാഷ്ട്ര ഖുര്‍ആന്‍ മത്സരങ്ങളില്‍ മലയാളി ഹാഫിദിന് അഭിമാന നേട്ടം. യു.എ.ഇയില്‍ നടന്ന അന്താരാഷ്ട്ര ഖുര്‍ആന്‍ മത്സരങ്ങളിലാണു മലപ്പുറം മങ്കട പള്ളിപ്പുറം സ്വദേശി ഹാഫിദ് സിനാന്‍ മുഹമ്മദ് നൂറുല്ല മികച്ച വിജയം കൊയ്തത്. ദുബൈ ഹോളി ഖുര്‍ആന്‍ അവാര്‍ഡിന്റെ പിന്തുണയോടെ ദര്‍ശന ടി.വി ദുബായില്‍ സംഘടിപ്പിച്ച അന്താരാഷ്ട്ര ഖുര്‍ആന്‍ പാരായണ മത്സരത്തില്‍ രണ്ടാം സ്ഥാനവും ആദ്യ മൂന്നു സ്ഥാനങ്ങളിലെ ഏക ഇന്ത്യക്കാരനെന്ന ബഹുമതിയും സിനാന്‍ കരസ്ഥമാക്കി. ഒന്ന്, മൂന്ന്, സ്ഥാനങ്ങള്‍ യഥാക്രമം ആതിഥേയരായ യു.എ.ഇ,  ബംഗ്ലാദേശ് എന്നീ രാജ്യങ്ങളില്‍ നിന്നുള്ള മത്സരാര്‍ഥികള്‍ക്കാണു ലഭിച്ചത്.  
നേരത്തെ അബൂദാബി ഔഖാഫിന്റെ സഹകരണത്തോടെ നടന്ന ഇന്ത്യന്‍ സോഷ്യല്‍ സെന്റര്‍ ഖുര്‍ആന്‍ പാരായണ മത്സരത്തില്‍ സിനാന്‍ ഒന്നാം സ്ഥാനം  നേടിയിരുന്നു. മലപ്പുറം ജില്ലയിലെ മങ്കട പള്ളിപ്പുറം ആലുങ്ങല്‍ മൊയ്തീന്‍ മുസ്‌ലിയാരുടെ മകന്‍ മുഹമ്മദ് നൂറുല്ലയാണ് സിനാനിന്റെ പിതാവ്. മാതാവ് പരേതനായ ആദൃശ്ശരി മുഹമ്മദ് മുസ്‌ലിയാരുടെ മകള്‍ നഫീസയും. ദുബൈ ഖലീജ്  ടൈംസ് പത്രം സിനാനിന്റെ  മികവിനെ പ്രശംസിച്ചു റിപ്പോര്‍ട്ട ചെയ്തിരുന്നു. സ്‌കൂള്‍ കലോത്സവത്തില്‍ യു.പി വിഭാഗം ഖുര്‍ആന്‍ പാരായണ മത്സരത്തില്‍  ഒന്നാം സ്ഥാനവും മാപ്പിളപ്പാട്ടില്‍ എ.ഗ്രേഡും നേടിയ ഈ പ്രതിഭ ഒമ്പതാം വയസിലാണു ഖുര്‍ആന്‍ പഠനം ആരംഭിച്ചത്. ഒന്നര വര്‍ഷം കൊണ്ടു ഖുര്‍ആന്‍ മുഴുവന്‍ മന: പാഠമാക്കി ഹാഫിദായ സിനാന്‍ ഇപ്പോള്‍ യു.എ.ഇയില്‍ ഒമ്പതാം ക്ലാസ് വിദ്യാര്‍ഥിയാണ്.