കാഞ്ഞങ്ങാട്: അനിശ്ചിതത്ത്വത്തിലായ അജാനൂര്‍ ഹാര്‍ബര്‍ നിര്‍മാണം ആരംഭിക്കണമെന്നാവശ്യപ്പെട്ട് നൂറോളം മത്സ്യത്തൊഴിലാളി കുടുംബങ്ങള്‍ തെരഞ്ഞെടുപ്പ് ബഹിഷ്‌കരിക്കാനൊരുങ്ങുന്നു. രണ്ടു വര്‍ഷം മുന്‍പാണ് അജാനൂര്‍ ഹാര്‍ബര്‍ സര്‍വേ തുടങ്ങിയത്.
പിന്നീട് വന്ന സര്‍ക്കാറുകള്‍ പദ്ധതിക്ക് തത്വത്തില്‍ അംഗികാരം നല്‍കുകയും ഫണ്ട് വകയിരുത്തുകയും ചെയ്തു. ഫിഷറിസ് മന്ത്രി ജെ. മേഴ്‌സിക്കുട്ടിയമ്മ കഴിഞ്ഞ വര്‍ഷം പദ്ധതി പ്രദേശം സന്ദര്‍ശിക്കുകയും ഹാര്‍ബര്‍ എത്രയും പെട്ടെന്ന് യാഥാര്‍ഥ്യമാവുമെന്ന് ഉറപ്പുനല്‍കുകയും ചെയ്തു. ജില്ലയിലിങ്ങനെയൊരു ഹാര്‍ബര്‍ ഉണ്ടാകുന്നത് ആഴിത്തല മുതല്‍ മേല്‍പ്പറമ്പുവരെയുളള മത്സ്യത്തൊഴിലാളികള്‍ക്ക് ഏറ്റവും ഗുണപരവും ആയിരുന്നു.
എന്നാല്‍ 97 ശതമാനവും പൂര്‍ത്തിയായ സര്‍വേക്ക് ശേഷവും ഹാര്‍ബറിനുവേണ്ടി ചെറുവിരലനക്കാന്‍ ആരും തയാറാകാത്തതിനെ തുടര്‍ന്നാണ് തീരദേശവാസികള്‍ തണല്‍ കൂട്ടായ്മയുടെ നേതൃത്വത്തില്‍ ഇന്നലെ വൈകുന്നേരം അജാനൂര്‍ ഫിഷ് ലാന്‍ഡിനു സമീപം ഒത്തുകൂടി പ്രതിഷേധ പരിപാടികള്‍ ആരംഭിച്ചത്.
തെരഞ്ഞെടുപ്പിനു മുന്നോടിയായി ഹാര്‍ബറിന്റെ പ്രവര്‍ത്തനം ആരംഭിച്ചില്ലെങ്കില്‍ തെരഞ്ഞെടുപ്പ് ബഹിഷ്‌കരണവും മറ്റ് പ്രതിഷേധ സമരങ്ങളും സംഘടിപ്പിക്കുമെന്ന് തണല്‍ കൂട്ടായ്മ പ്രവര്‍ത്തകര്‍ അറിയിച്ചു. യോഗം തണല്‍ കൂട്ടായ്മ രക്ഷാധികാരി കെ. രാജന്‍ ഉദ്ഘാടനം ചെയ്തു.
പ്രസിഡന്റ് ബിന്ദു കുഞ്ഞികൃഷ്ണന്‍ അധ്യക്ഷയായി. കെ. രവീന്ദ്രന്‍, കെ. രഘു, പി.വി രമേശന്‍, കെ.പി രാജന്‍, പി.വി പ്രകാശന്‍, കെ.പി സുമേഷ്, കെ. സജീവന്‍ സംസാരിച്ചു.