കോഴിക്കോട്: പുതിയങ്ങാടി കോയാറോഡ് റെയില്‍വേ ഗേറ്റിന്     സമീപം കാണപ്പെട്ട മതാവിന്റെയും മുന്നു മക്കളുടെയും ചേതനയറ്റ ശരീരം നാടിനെ നടുക്കി.
ഇന്നലെ കോയാറോഡ് മസ്ജിദില്‍ നിന്ന് സുബ്ഹി നിസ്‌കാരം കഴിഞ്ഞു മടങ്ങുന്നവരാണ് റെയില്‍വേ ട്രാക്കില്‍ മാതാവിന്റെയും മൂന്നു മക്കളുടെയും മൃതദേഹങ്ങള്‍ കണ്ടത്. മലപ്പുറം തിരൂരങ്ങാടി  പടിഞ്ഞാറ്റില്‍ പുത്തന്‍വീട്ടില്‍ രാജേഷിന്റെ ഭാര്യ ഭാവനയുടെയും മൂന്നു പെണ്‍മക്കളുടെയും ദാരുണാന്ത്യത്തിനാണ് പ്രദേശം സാക്ഷിയായത്.
മാതാവിനു സമീപത്തായി കാണപ്പെട്ട മക്കളായ ഐശ്യര്യ, നന്ദിനി, വിസ്മയ എന്നീ വിദ്യാര്‍ഥിനികളുടെ മൃതദേഹം ദുഃഖത്തിന്റെ വ്യാപ്തി വര്‍ധിപ്പിച്ചു. സംഭവം ശ്രദ്ധയില്‍പ്പെട്ട നാട്ടുകാര്‍ ഉടന്‍ എലത്തൂര്‍ പൊലിസ് സ്റ്റേഷനില്‍ വിവരം അറിയിക്കുകയായിരുന്നു.
പൊലിസെത്തി മൃതദേഹങ്ങള്‍ പരിശോധന നടത്തിയപ്പോഴാണ് ഭാവനയുടെ ചൂണ്ടുവിരലില്‍ തെരഞ്ഞെടുപ്പില്‍ വോട്ട് രേഖപ്പെടുത്തിയതിന്റെ മഷിയടയാളം കാണുന്നത്. തുടര്‍ന്ന് വിവരം മലപ്പുറത്തെ പൊലിസ് സ്റ്റേഷനുകളിലേക്ക് അറിയിക്കുകയായിരുന്നു.
ഇന്‍ക്വസ്റ്റിനു ശേഷം മൃതദേഹങ്ങള്‍ കോഴിക്കോട് മെഡിക്കല്‍ കോളജിലേക്ക് മാറ്റി. മലപ്പുറത്തെ തിരൂരങ്ങാടി സ്റ്റേഷനില്‍ ഇവരെ കാണാതായതുമായി ബന്ധപ്പെട്ട് ഭര്‍ത്താവ് രാജേഷിന്റെ പരാതി ലഭിച്ചിരുന്നു. ഇയാള്‍ മെഡിക്കല്‍ കോളജിലെത്തി മൃതദേഹങ്ങള്‍ തിരിച്ചറിയുകയും ചെയ്തു.
വയാട്ടിലെ പടിഞ്ഞാറത്തറ സ്വദേശിനിയാണ് മരിച്ച ഭാവന. തിരവനന്തപുരം നെടുമങ്ങാട് സ്വദേശിയായ രാജേഷുമായി പ്രണയ വിവാഹമായിരുന്നു ഇവരുടേത്.