കൊണ്ടോട്ടി: ഇന്ത്യയില്‍ സാധാരണക്കാരനും യാത്രക്ക് വിമാനങ്ങളെ ആശ്രയിച്ചു തുടങ്ങിയതോടെ രാജ്യത്ത് വിമാന യാത്രക്കാരുടെ എണ്ണത്തിലും ചരക്ക് നീക്കത്തിലും ക്രമാതീതമായ വര്‍ധന. ഇക്കഴിഞ്ഞ സാമ്പത്തിക വര്‍ഷം രാജ്യത്തെ വിവിധ വിമാനത്താവളങ്ങള്‍ വഴി മുന്‍വര്‍ഷത്തേക്കാള്‍ 12.9 ശതമാനം അധികം പേരാണ് യാത്ര ചെയ്തതെന്ന് കേന്ദ്ര വ്യോമയാന മന്ത്രാലയത്തിന്റെ കണക്കുകള്‍ വ്യക്തമാക്കുന്നു. വിമാന സര്‍വിസുകളുടെ എണ്ണത്തില്‍ 13.3 ശതമാനത്തിന്റെയും കാര്‍ഗോ ചരക്ക് നീക്കത്തില്‍ 6.4 ശതമാനത്തിന്റെയും വര്‍ധനവുമുണ്ടായി.
ഇക്കഴിഞ്ഞ സാമ്പത്തിക വര്‍ഷം ആഭ്യന്തര സെക്ടറില്‍ 251.92 ദശലക്ഷം പേരാണ് വിമാനങ്ങളില്‍ സഞ്ചരിച്ചത്. തൊട്ടുമുമ്പുള്ള വര്‍ഷം 220.63 ദശലക്ഷമായിരുന്നു. 14.6 ശതമാനത്തിന്റെ വര്‍ധനവാണുണ്ടായത്. ഇന്ത്യക്ക് അകത്ത് വിവിധ വിമാനത്താവളങ്ങള്‍ വഴി വിമാന സര്‍വിസുകള്‍ കൂടിയതും നിരക്ക് താരതമ്യേന സീസണ്‍ അല്ലാത്ത സമയത്ത് ഗണ്യമായി കുറച്ചതുമാണ് യാത്രക്കാര്‍ വര്‍ധിക്കാന്‍ കാരണം. കഴിഞ്ഞ സാമ്പത്തിക വര്‍ഷത്തില്‍ 63.59 ദശലക്ഷം യാത്രക്കാരാണ് വിദേശത്തേക്ക് പറന്നത്. എന്നാല്‍ തൊട്ടുമുമ്പുള്ള വര്‍ഷമിത് 59.62 ദശലക്ഷമായിരുന്നു. 6.7 ശതമാനത്തിന്റെ വര്‍ധനവുണ്ടായി. 414.90 അന്താരാഷ്ട്ര വിമാന സര്‍വിസുകളാണ് കഴിഞ്ഞ സാമ്പത്തിക വര്‍ഷമുണ്ടായത്. എന്നാല്‍ തൊട്ടുമുമ്പുള്ള സാമ്പത്തിക വര്‍ഷമിത് 399.81000 മാത്രമായിരുന്നു. 3.8 ശതമാനത്തിന്റെ വര്‍ധനവുണ്ടായി. ഇന്ത്യക്ക് അകത്ത് ആഭ്യന്തര സെക്ടറില്‍ 15.6 ശതമാനത്തിന്റെ വര്‍ധനവാണുണ്ടായത്. വിമാനങ്ങള്‍ വഴിയുള്ള ചരക്ക് നീക്കത്തില്‍ 6.4 ശതമാനത്തിന്റെ വര്‍ധവുണ്ടായി. വിദേശത്തേക്ക് 2004.85 മെട്രിക് ടണ്‍ കാര്‍ഗോ ഉല്‍പന്നങ്ങളാണ് കയറ്റി അയച്ചത്. തൊട്ടുമുമ്പുള്ള വര്‍ഷം 1948.61 മെട്രിക് ടണ്‍ ആയിരുന്നു. ആഭ്യന്തര സെക്ടറില്‍ 1246.76 മെട്രിക് ടണ്ണായിരുന്നു. എന്നാല്‍ തൊട്ടുമുമ്പ് ഇത് 1106.20 മെട്രിക് ടണ്ണായിരുന്നു.12.7 ശതമാനത്തിന്റെ വര്‍ധവാണുണ്ടായത്.