കരുനാഗപ്പള്ളി: തയ്യല്‍ തൊഴിലാളികള്‍ക്കു ലഭിക്കേണ്ട ആനുകൂല്യങ്ങള്‍ പോലും സംരക്ഷിച്ചു നല്‍കാന്‍ കഴിയാത്ത തയ്യല്‍ തൊഴിലാളി ക്ഷേമനിധി ബോര്‍ഡ് പിരിച്ചുവിടണമെന്നു തയ്യല്‍ തൊഴിലാളി കോണ്‍ഗ്രസ് സംസ്ഥാന പ്രസിഡന്റ് ബാബു അമ്മവീട് സര്‍ക്കാരിനോട് ആവശ്യപ്പെട്ടു.
ഇതുസംബന്ധിച്ചുള്ള പരാതി ഉടന്‍ സര്‍ക്കാരിനു നല്‍കുമെന്ന് അദ്ദേഹം പറഞ്ഞു. തയ്യല്‍ തൊഴിലാളി കോണ്‍ഗ്രസ് തൊടിയൂര്‍ മേഖലാ സമ്മേളനം വെളുത്തമണലില്‍ ഉദ്ഘാടനം ചെയ്യുകയായിരുന്നു അദ്ദേഹം.
യു.ഡി.എഫ് സര്‍ക്കാരിന്റെ ഭരണകാലത്ത് ഇതര ക്ഷേമനിധികള്‍ക്കൊപ്പം നല്‍കിക്കൊണ്ടിരുന്ന പതിനയ്യായിരം രൂപ പ്രസവകാല ധനസഹായം ബോര്‍ഡിന്റെ അനാസ്ഥമൂലം ഇപ്പോഴും രണ്ടായിരം രൂപയായി നല്‍കിക്കൊണ്ടിരിക്കുകയാണ്.
ഓണ്‍ലൈന്‍ രജിസ്‌ട്രേഷന്‍ നടപടികള്‍ പൂര്‍ത്തീകരിച്ചിട്ടും കഴിഞ്ഞ ഒരുവര്‍ഷമായി അംഗങ്ങള്‍ക്ക് കാര്‍ഡുപോലും കൊടുക്കാന്‍ കഴിയാത്ത അവസ്ഥയാണുള്ളത്. അംശാദായ അടവിലുണ്ടായ അശാസ്ത്രീയമായ നടപടികള്‍ മൂലം ലക്ഷക്കണക്കിനു ബുക്കുകളാണ് നഷ്ടമായിക്കൊണ്ടിരിക്കുന്നതെന്നും യോഗം ആരോപിച്ചു.
യൂനിയന്‍ പ്രസിഡന്റ് എം. സ്മിത അധ്യക്ഷയായി. സംസ്ഥാന വൈസ് പ്രസിഡന്റ് കരുണാലയം സുകുമാരന്‍, ജില്ലാ പ്രസിഡന്റ് സബീര്‍ വവ്വാക്കാവ്, ശ്രീവിദ്യ, ശകുന്തള അമ്മവീട്, തൊടിയൂര്‍ സുനില്‍കുമാര്‍, മഴവഞ്ചേരി രാധ, ഷീല കാവുങ്കല്‍, കെ. ശാന്തമ്മ, സംസം ഷാഹിദ, മൈനാഗപ്പള്ളി രാധാമണി സംസാരിച്ചു.