കണ്ണൂര്‍: തിരുവനന്തപുരം യൂനിവേഴ്‌സിറ്റി കോളജ് കത്തിക്കുത്തിനെ തുടര്‍ന്ന് ഇടക്കാലത്ത് മരവിപ്പിച്ച സിവില്‍ പൊലിസ് ഓഫിസര്‍ റാങ്ക് ലിസ്റ്റിന്റെ കാലാവധി നീട്ടണമെന്ന് ആവശ്യപ്പെട്ട് റാങ്ക് പട്ടികയില്‍ ഉള്‍പ്പെട്ട നാലുപേര്‍ ബഹുനില കെട്ടിടത്തിന് മുകളില്‍ കയറി ആത്മഹത്യാ ഭീഷണി മുഴക്കി. ആത്മഹത്യാ ഭീഷണിയും 300ലേറെ ഉദ്യോഗാര്‍ഥികള്‍ കൊവിഡ് മാനദണ്ഡം പാലിക്കാതെ കൂട്ടംകൂടി നിന്നു പ്രതിഷേധ സമരം സംഘടിപ്പിച്ചതും കണ്ണൂര്‍ നഗരത്തെ രണ്ടു മണിക്കൂര്‍ മുള്‍മുനയില്‍ നിര്‍ത്തി. സംഭവത്തില്‍ 34 പേര്‍ക്കെതിരേ ടൗണ്‍ പൊലിസ് കേസെടുത്തു.
ഇന്നലെ രാവിലെ 10.30ഓടെയായിരുന്നു കണ്ണൂര്‍ കലക്ടറേറ്റിന് മുന്നില്‍ നാടകീയ സംഭവങ്ങളുടെ തുടക്കം. പൊലിസ് റാങ്ക് പട്ടികയില്‍ ഉള്‍പ്പെട്ട തിരുവനന്തപുരം മുതല്‍ കാസര്‍കോട് വരെയുള്ള 300നടുത്ത് യുവാക്കള്‍ പ്ലക്കാര്‍ഡുമായി മുദ്രാവാക്യം വിളിച്ചാണു പ്രതിഷേധം ആരംഭിച്ചത്. ഇതിനിടയില്‍ സമരക്കാര്‍ക്കിടയില്‍ നിന്നു നാലുപേര്‍ തൊട്ടുമുന്നിലെ ബഹുനില കെട്ടിടത്തിനു മുകളില്‍ കയറി ആത്മഹത്യാ ഭീഷണി മുഴക്കി. ഡിവൈ.എസ്.പി പി.പി സദാനന്ദന്‍ സ്ഥലത്തെത്തി സമരക്കാരുമായി സംസാരിച്ചുവെങ്കിലും അനുനയത്തിന് തയാറായില്ല.
അരമണിക്കൂറിനുള്ളില്‍ തീരുമാനം ഉണ്ടായെങ്കില്‍ മാത്രമേ പിരിഞ്ഞുപോവുകയുള്ളൂവെന്നു സമരക്കാര്‍ പറഞ്ഞു. സമരക്കാരെ നീക്കാന്‍ ബലപ്രയോഗം വേണ്ടിവരുമെന്ന ഘട്ടംവന്നതിനെ തുടര്‍ന്നു കൂടുതല്‍ പൊലിസ് സ്ഥലത്തെത്തി. കെട്ടിടത്തിനു മുകളിലുള്ളവരെ താഴെയിറക്കാന്‍ അഗ്നിശമനസേനയും സ്ഥലത്തെത്തി.
ഇതിനിടെ സ്ഥലത്തെത്തി പൊലിസുമായി വാക്കേറ്റത്തിനു ശ്രമിച്ച സുദീപ് ജയിംസ് ഉള്‍പ്പെടെയുള്ള യൂത്തു കോണ്‍ഗ്രസ് നേതാക്കളെ പൊലിസ് ബലം പ്രയോഗിച്ച് കസ്റ്റഡിയിലെടുത്തു. വിവരമറിഞ്ഞെത്തിയ എസ്.പി യതീഷ് ചന്ദ്ര സമരക്കാരുമായി സംസാരിച്ചു.
കൊവിഡ് നിയന്ത്രണം ലംഘിച്ചുള്ള സമരം പാടില്ലെന്നും നിയമലംഘന സമരത്തിന് കേസെടുത്താല്‍ ഒരൊറ്റ റാങ്ക് പട്ടികയിലും ഇടംകിട്ടില്ലെന്നും എസ്.പി സമരക്കാരെ അറിയിച്ചു.
തുടര്‍ന്ന് ആത്മഹത്യാ ഭീഷണി നടത്തി കെട്ടിടത്തിന് മുകളില്‍ നിന്ന് സമരക്കാരും സ്വമേധയാ താഴെയിറങ്ങി.