റിയാദ്: രാജ്യത്തെ സ്വദേശികളുടെ വീടുകളില്‍ തൊഴിലെടുക്കുന്ന വിദേശ വീട്ടുജോലിക്കാരികള്‍ക്കും ബാങ്ക് അകൗണ്ട് നിര്‍ബന്ധമാക്കുന്നു. ഗാര്‍ഹിക തൊഴിലാളികളുടെയും വേതന സുരക്ഷക്കായാണ് ഇത് നിര്‍ബന്ധമാക്കുന്നത്.

വനിതാ ഗാര്‍ഹിക തൊഴിലാളികള്‍ക്ക് ബാങ്ക് അക്കൗണ്ട് തുറക്കുന്നതിനു തൊഴിലുടമകള്‍ നിര്‍ബന്ധിപ്പിക്കുന്ന പദ്ധതിക്കാണ് സഊദി തൊഴില്‍ സാമൂഹിക വികസന മന്ത്രാലയം തുടക്കമിടുന്നത്. വീട്ടുജോലിക്കാരുടെ വിസയില്‍ രാജ്യത്ത് എത്തുന്ന വനിതകള്‍ക്ക് തൊഴില്‍ കരാര്‍ നിഷ്‌കര്‍ഷിക്കുന്ന വേതനം ലഭിക്കുന്നുണ്ടെന്ന് ഉറപ്പു വരുത്തുകയും അവകാശങ്ങള്‍ സംരക്ഷിക്കുകയും ചെയ്യുന്നതിന്റെ ഭാഗമായാണ് മന്ത്രാലയം ഈ സുപ്രധാന തീരുമാനം നടപ്പാക്കുന്നത്.

വീട്ടുജോലിക്കാരായ വനിതകള്‍ക്ക് ബാങ്ക് അക്കൗണ്ട് നിര്‍ബന്ധമാക്കുന്നത് വഴി ഇരുകൂട്ടരും തമ്മിലുള്ള കരാര്‍ യഥാവിധി പരിരക്ഷിക്കപ്പെടുന്നുവെന്നും യഥാസമയം വിലയിരുത്തരുന്നതിനും സാധിക്കുമെന്ന് തൊഴില്‍ സാമൂഹിക വികസന മന്ത്രാലയ അണ്ടര്‍ സിക്രട്ടറി ഖാലിദ് അബല്‍ഖൈല്‍ പറഞ്ഞു.

സഊദി അറേബ്യ ഉയര്‍ത്തിപ്പിടിക്കുന്ന മനുഷ്യാവകാശ മൂല്യങ്ങള്‍ ശക്തിപ്പെടുത്തുക, തൊഴില്‍ സുരക്ഷാ നിലവാരം ഉയര്‍ത്തുക, തൊഴില്‍ സാഹചര്യം നന്നാക്കുക, തുടങ്ങിയവയും പദ്ധതിയിലൂടെ മന്ത്രാലയം ലക്ഷ്യമിടുന്നുണ്ട്. പദ്ധതിയുടെ പ്രാഥമിക ഘട്ടത്തില്‍ രാജ്യത്തെ മുഴുവന്‍ വിദേശ വീട്ടുജോലിക്കാരികളെയും ഉള്‍പ്പെടുത്തുമെന്ന് മന്ത്രി വ്യക്തമാക്കി.