അന്തിക്കാട്: പാന്തോടിനു സമീപം വീടിനു നേരെ ആക്രമണം. വാല പറമ്പില്‍ ഉപേന്ദ്രന്റെ വീടിനു നേരെ ഇന്നലെ പുലര്‍ച്ചെയാണ് ആക്രമണം നടന്നത്.
വീടിന്റെ മുറിയുടെ രണ്ടു ഭാഗങ്ങളിലായി നാലു ജനല്‍ ചില്ലുകളാണ് അടിച്ചു തകര്‍ത്തിട്ടുള്ളത്. ശബ്ദം കേട്ട് വീട്ടുകാര്‍ ഉണര്‍ന്നെങ്കിലും അക്രമിയെ കണ്ടെത്താനായില്ല. വീടിനകത്ത് ഉറങ്ങിയ കുട്ടികള്‍ ഉള്‍പ്പടെയുള്ളവരുടെ ദേഹത്ത് ചില്ലുകള്‍ പതിച്ചെങ്കിലും പരുക്കേല്‍ക്കാതെ രക്ഷപ്പെട്ടു. വീട്ടുകാര്‍ അറിയച്ചതിനെ തുടര്‍ന്ന് അന്തിക്കാട് എസ്.ഐ സംഗീത് പുനത്തിലിന്റെ നേതൃത്വത്തില്‍ പൊലിസെത്തി പരിശോധന നടത്തി. സംഭവത്തില്‍ കേസെടുത്ത് അന്വേഷണം ആരംഭിച്ചതായി പൊലിസ് പറഞ്ഞു.