പൊലിസിന് അന്വേഷണ സമയം നീട്ടി നല്‍കിയത് അംഗീകരിച്ചു

ന്യൂഡല്‍ഹി: ഷഹീന്‍ ബാഗ് സമരത്തിനു പിന്നില്‍ പ്രവര്‍ത്തിച്ച ജെ.എന്‍.യു വിദ്യാര്‍ഥി ഷര്‍ജീല്‍ ഇമാമിന് സ്വാഭാവിക ജാമ്യം തടഞ്ഞ് ഡല്‍ഹി ഹൈക്കോടതി. ഷര്‍ജീലിനെതിരായ കേസില്‍ അന്വേഷണം നടത്തുന്നതിന് പൊലിസിന് മൂന്നു മാസം കൂടി സമയം അനുവദിച്ച വിചാരണാ കോടതി വിധിക്കെതിരായ ഷര്‍ജീലിന്റെ ഹരജി തള്ളിയാണ് ഡല്‍ഹി ഹൈക്കോടതി ജഡ്ജി ജ. വി. കാമേശ്വര റാവുവിന്റെ നടപടി.  പൗരത്വനിയമ ഭേദഗതിക്കെതിരായ സമരത്തിനിടെ പ്രകോപനപരമായ പ്രസംഗം നടത്തിയെന്ന കുറ്റം ചുമത്തി ജനുവരി 28നാണ് ഡല്‍ഹി പൊലിസ് ഷര്‍ജീലിനെ അറസ്റ്റ് ചെയ്തത്. തുടര്‍ന്ന് യു.എ.പി.എ ചുമത്തുകയും ചെയ്തു. 

അറസ്റ്റിലായി 88 ദിവസം പൂര്‍ത്തിയായ ഉടനെയാണ് പെലിസിന് അന്വേഷണം പൂര്‍ത്തിയാക്കാന്‍ വിചാരണ കോടതി മൂന്ന് മാസം കൂടി സമയം അനുവദിച്ചത്. ഇതോടെ 90 ദിവസം പൂര്‍ത്തിയായാല്‍ സ്വാഭാവിക ജാമ്യം ലഭിക്കാനുള്ള സാധ്യത ഇല്ലാതായി. തനിക്ക് നോട്ടീസ് പോലും നല്‍കാതെയാണ് വിചാരണാകോടതി സമയം നീട്ടി നല്‍കിയതെന്നും ഇത് സ്വാഭാവിക നീതിയുടെ ലംഘനമാണെന്നും ചൂണ്ടിക്കാട്ടിയാണ് ഷര്‍ജീല്‍ ഹൈക്കോടതിയെ സമീപിച്ചത്. കൂടുതല്‍ സമയം നീട്ടിനല്‍കേണ്ട സാഹചര്യമില്ലെന്നും ഹരജിയില്‍ വാദിച്ചു. ഷര്‍ജീലിന്റെ പ്രസംഗം വിശാലമായ ഗൂഢാലോചനയുടെ ഭാഗമാണെന്നായിരുന്നു പൊലിസ് വാദം. ഡല്‍ഹിയില്‍ കലാപമുണ്ടാക്കാന്‍ നടത്തിയ ഗൂഢാലോചനയുടെ ഭാഗമാണ് ഷര്‍ജീല്‍ ഇമാമെന്നും പൊലിസ് ആരോപിക്കുന്നു.