ചാവക്കാട്: നഗരത്തില്‍ സ്വകാര്യ ബസിടിച്ച് ബൈക്ക് യാത്രികരായ ദമ്പതികള്‍ക്ക് പരുക്കേറ്റു. കുരഞ്ഞൂര്‍ വെള്ളറ ജിജോ (34), ഭാര്യ ജിയാ (20) എന്നിവര്‍ക്കാണ് പരുക്ക് പറ്റിയത്.
ചാവക്കാട് തെക്കെ ബൈപാസില്‍ ഇന്നലെ വൈകുന്നേരമാണ് അപകടം. നഗരസഭാ ബസ്സ്റ്റാന്‍ഡില്‍ നിന്ന് റോഡിലേക്കിറങ്ങിയ ശ്രീ ദുര്‍ഗ എന്ന സ്വകാര്യ ബസാണ് ബൈക്കിലിടിച്ചത്.  ബസിനടിയില്‍ അകപ്പെട്ട ദമ്പതികളെ പരിസരത്തുണ്ടായിരുന്ന നാട്ടുകാരാണ് പുറത്തെടുത്തത്. പരുക്കേറ്റവരെ ഹയാത്ത് ആശുപത്രിയില്‍ പ്രവേശിപ്പിച്ചു. സംഭവമുണ്ടായ ഉടനെ ബസ് ജീവനക്കാര്‍ ഓടി രക്ഷപ്പെട്ടു. അപകടത്തെ തുടര്‍ന്ന് ചാവക്കാട് നഗരത്തിലും പരിസരങ്ങളിലും ഏറെ നേരം ഗതാഗതം തടസപ്പെട്ടു.