നാദാപുരം: സ്വകാര്യ ഓഡിറ്റോറിയത്തില്‍ കല്യാണത്തിനെത്തിയവര്‍ വാഹനം റോഡില്‍ പാര്‍ക്ക് ചെയ്തതിനെ ചൊല്ലിയുണ്ടായ വാക്കേറ്റം നേരിയ സംഘര്‍ഷത്തില്‍ കലാശിച്ചു. കല്ലാച്ചി വളയം റോഡിലെ ഓത്തിയില്‍മുക്കില്‍ പുതുതായി നിര്‍മിച്ച കല്യാണ മണ്ഡപത്തില്‍ കല്യാണ ത്തിനെത്തിയവര്‍ റോഡില്‍ വാഹനം പാര്‍ക്ക് ചെയ്തതിനെ തുടര്‍ന്ന് ഇതുവഴിയുള്ള ഗതാഗതം തടസപ്പെട്ടതാണ് പ്രശ്‌നങ്ങള്‍ക്കിടയാക്കിയത്.
പൊലിസ് വാഹനങ്ങളും ആംബുലന്‍സും റോഡില്‍ കുടുങ്ങിയതോടെയാണ് നാട്ടുകാരുമായി തര്‍ക്കം ഉടലെടുത്തത്. കഴിഞ്ഞദിവസം വളയം പൊലിസ് ഉടുമ്പിറങ്ങി മലയില്‍നിന്ന് പിടികൂടിയ ഡിറ്റനേറ്റര്‍ അടക്കമുള്ള സ്‌ഫോടക വസ്തുക്കള്‍ പരിശോധിക്കാന്‍ കോഴിക്കോട് നിന്നെത്തിയ ഉന്നത പൊലിസ് ഉദ്യോഗസ്ഥന്റെ വാഹനവും മണിക്കൂറുകളോളം ഇവിടെകുടുങ്ങി. തുടര്‍ന്നു വളയം പൊലിസ് സ്ഥലത്തെത്തിയാണ് ഗതാഗതം പുനഃസ്ഥാപിച്ചത്. അനധികൃതമായി പാര്‍ക്ക് ചെയ്ത വാഹനങ്ങള്‍ക്കെതിരേ നടപടിയെടുക്കാനാണു പൊലിസിന്റെ തീരുമാനം.