ജലാലാബാദ്: അഫ്ഗാനിസ്താനിലെ കിഴക്കന്‍ നഗരമായ ജലാലാബാദില്‍ ചാവേര്‍ സ്‌ഫോടനത്തില്‍ 12 മരണം. അഞ്ച് പേര്‍ക്ക് പരുക്കേറ്റു. മരിച്ചവരിലേറെയും പ്രദേശവാസികളാണ്.
പെട്രോള്‍ സ്റ്റേഷന് സമീപം നടന്ന സ്‌ഫോടനത്തെ തുടര്‍ന്ന് പെട്രോള്‍ ബങ്ക് കത്തിനശിച്ചു. സമീപകാലത്തുണ്ടായ വലിയ സ്‌ഫോടനമാണ് ഇന്നലെയുണ്ടായത്. പരുക്കേറ്റവരെ സാരമായ പൊള്ളലുകളോടെ ആശുപത്രിയില്‍ പ്രവേശിപ്പിച്ചിരിക്കുകയാണ്. ഒരു വലിയ തീഗോളം ഉയരുന്നതായും ആളുകള്‍ വലിച്ചെറിയപ്പെടുന്നതുമായി കണ്ടതായി പ്രദേശവാസി വ്യക്തമാക്കി.
ഭീകരസംഘടനയായ ഐ.എസ് സ്‌ഫോടനത്തിന്റെ ഉത്തരവാദിത്തം ഏറ്റെടുത്തിട്ടുണ്ട്. യു.എസും അഫ്ഗാന്‍ സൈന്യവും ഐ.എസിനെതിരായി ആക്രമണം തുടരുന്നതിനിടയിലും ഏതാനും ആഴ്ചകളായി പ്രവിശ്യയില്‍ നിരവധി ആക്രമണങ്ങളാണ് ഐ.എസ് നടത്തിയത്. അഫ്ഗാന്‍ സര്‍ക്കാരും താലിബാനുമായുള്ള സമാധാന സംഭാഷണങ്ങളില്‍ പ്രതീക്ഷ പ്രകടിപ്പിക്കുന്നതായുള്ള യു.എസ് സ്റ്റേറ്റ് സെക്രട്ടറി മൈക് പോംപിയോയുടെ പ്രസ്താവന വന്നതിനു പിറ്റേന്നാണ് അഫ്ഗാന്റെ ആക്രമണമെന്നതും ശ്രദ്ധേയമാണ്. കാബൂള്‍ സന്ദര്‍ശനത്തിനിടെയായിരുന്നു മൈകിന്റെ പ്രസ്താവന.