അലക്‌സാന്‍ഡ്രിയ: ഇന്ത്യ- ഈജിപ്ത് ഫ്രണ്ട്ഷിപ്പ് കപ്പ് ഇന്ത്യയുടെ അണ്ടര്‍ 16 ഫുട്‌ബോള്‍ ടീമിന്. ഇത് രണ്ടാം തവണയാണ് ടീം നേട്ടം സ്വന്തമാക്കുന്നത്. രണ്ടാം സൗഹൃദ മത്സരത്തില്‍ അലക്‌സാന്‍ഡ്രിയ സ്മൗഹ ക്ലബിനെ ഒന്നിനെതിരേ മൂന്ന് ഗോളുകള്‍ക്ക് തകര്‍ത്താണ് ഇന്ത്യന്‍ കൗമാര സംഘം നേട്ടം സ്വന്തമാക്കിയത്. മത്സരത്തില്‍ ഇന്ത്യന്‍ താരം രോഹിത് തനു ഹാട്രിക്ക് ഗോളുകളുമായി തിളങ്ങി. നേരത്തെ ആദ്യ മത്സരത്തില്‍ കെയ്‌റോയില്‍ നിന്നുള്ള അല്‍- അഹ്‌ലി ക്ലബിനെ ഇന്ത്യന്‍ ചുണക്കുട്ടികള്‍ ഒറ്റ ഗോളിന് വീഴ്ത്തി ജയം സ്വന്തമാക്കിയിരുന്നു.
ആദ്യ മത്സരത്തിലും രോഹിത് തനുവിന്റെ ഗോളാണ് ഇന്ത്യക്ക് വിജയമൊരുക്കിയത്. രണ്ട് മത്സരങ്ങളില്‍ ഇന്ത്യ നേടിയ നാല് ഗോളിനും ഇന്ത്യയുടെ ഭാവി വാഗ്ദാനമായി വിലയിരുത്തപ്പെടുന്ന രോഹിത് അര്‍ഹനായി. കരിയറില്‍ ആദ്യമായാണ് ഹാട്രിക്ക് നേടുന്നതെന്നും ഗോള്‍ സ്‌കോര്‍ ചെയ്യാനായതില്‍ സന്തോഷവും അഭിമാനവുമുണ്ടെന്നും മത്സര ശേഷം രോഹിത് വ്യക്തമാക്കി.
ആദ്യമായാണ് ഇന്ത്യന്‍ ഫുട്‌ബോള്‍ ടീം ഈജിപ്തില്‍ സന്ദര്‍ശനത്തിനെത്തുന്നത്. നൈല്‍ സാംസ്‌കാരികോത്സവത്തിന്റെ ഭാഗമായാണ് മത്സരം സംഘടിപ്പിച്ചത്.