ജമൈക്ക: വെസ്റ്റിന്‍ഡീസിനെതിരായ ഒന്നാം ക്രിക്കറ്റ് ടെസ്റ്റില്‍ പാകിസ്താന്‍ പൊരുതുന്നു. നാലാം ദിനം കളി നിര്‍ത്തുമ്പോള്‍ പാകിസ്താന്‍ അഞ്ച് വിക്കറ്റ് നഷ്ടത്തില്‍ 278 റണ്‍സെന്ന നിലയില്‍. ആദ്യ ഇന്നിങ്‌സില്‍ വിന്‍ഡീസ് 286 റണ്‍സില്‍ പുറത്തായിരുന്നു. അഞ്ച് വിക്കറ്റുകള്‍ കൈയിലിരിക്കേ പാകിസ്താന് വിന്‍ഡീസിന്റെ സ്‌കോറിനൊപ്പമെത്താന്‍ എട്ട് റണ്‍സ് കൂടി വേണം. കരിയറിലെ അവസാന പരമ്പരയ്ക്കിറങ്ങിയ നായകന്‍ മിസ്ബ ഉള്‍ ഹഖ് 35 റണ്‍സുമായും സര്‍ഫ്രാസ് അഹമദ് 23 റണ്‍സുമായും ക്രീസില്‍. അവസാന പരമ്പര കളിക്കുന്ന യൂനിസ് ഖാന്‍ 58 റണ്‍സില്‍ പുറത്തായി. 72 റണ്‍സെടുത്ത ബാബര്‍ അസമും മികച്ച പ്രകടനം പുറത്തെടുത്തു. വിന്‍ഡീസിനായി ഗബ്രിയേല്‍ മൂന്നും ജോസഫ്, നായകന്‍ ഹോള്‍ഡര്‍ എന്നിവര്‍ ഒരോ വിക്കറ്റും വീഴ്ത്തി.
നേരത്തെ മഴയെ തുടര്‍ന്നു കളിയുടെ ഭൂരിഭാഗവും നഷ്ടമായപ്പോള്‍ ടോസ് നഷ്ടപ്പെട്ട് ബാറ്റിങിനിറങ്ങിയ വിന്‍ഡീസ് 286 റണ്‍സില്‍ പുറത്താകുകയായിരുന്നു. 63 റണ്‍സെടുത്ത ചെയ്‌സാണ് ടോപ് സ്‌കോറര്‍. ഹോള്‍ഡര്‍ (57), ഡോവ്‌റിച് (56) എന്നിവരും തിളങ്ങി. പാകിസ്താനായി മുഹമ്മദ് ആമിര്‍ ആറ് വിക്കറ്റുകള്‍ വീഴ്ത്തി. യാസിര്‍ ഷ രണ്ടും മുഹമ്മദ് അബ്ബാസ്, വഹാബ് റിയാസ് എന്നിവര്‍ ഓരോ വിക്കറ്റും വീഴ്ത്തി.