ന്യൂയോര്‍ക്ക്: അമേരിക്കയിലെ ടെക്‌സാസില്‍ കൊവിഡ് രോഗി സംഘടിപ്പിച്ച പാര്‍ട്ടിയില്‍ പങ്കെടുത്ത മുപ്പതുകാരന്‍ വൈറസ് ബാധിച്ച് മരിച്ചു. വൈറസ് യഥാര്‍ഥത്തില്‍ ഇല്ലാത്ത വസ്തുവാണെന്നാണ് യുവാവ് ധരിച്ചിരുന്നതെന്ന് ചികിത്സിച്ച മെത്തഡിസ്റ്റ് ആശുപത്രിയിലെ ചീഫ് മെഡിക്കല്‍ ഓഫിസര്‍ ജെയിന്‍ ആപ്പിള്‍ബേ പറയുന്നു. ഇനി ഉണ്ടെങ്കില്‍ തന്നെ ചെറുപ്പക്കാരനായതന്നെ വൈറസ് ബാധിക്കില്ലെന്നായിരുന്നു യുവാവ് കരുതിയിരുന്നത്.

കൊവിഡ് ബാധിച്ച ഒരു വ്യക്തി മറ്റുള്ളവരെ ക്ഷണിച്ച് സംഘടിപ്പിക്കുന്ന വിരുന്നാണ് കൊവിഡ് പാര്‍ട്ടി. കൊവിഡ് ബാധിക്കുന്ന ആര്‍ക്കെങ്കിലും രോഗത്തെ അതിജീവിക്കാന്‍ സാധിക്കുമോ എന്നറിയാനാണിത്. പ്രതിരോധശേഷിയുള്ളവര്‍ക്ക് രോഗം ബാധിക്കില്ലെന്ന ആത്മവിശ്വാസം മൂലം യുവാക്കളാണ് ഇതില്‍ പങ്കെടുക്കുന്നത്. ഇത്തരത്തിലൊരു പാര്‍ട്ടിയിലാണ് മുപ്പതുകാരനായ യുവാവും പങ്കെടുത്തത്. എന്നാല്‍ മരിക്കുന്നതിന് മുമ്പ് യുവാവിന് കുറ്റബോധം തോന്നിയിരുന്നതായി ആശുപത്രിയിലെ നഴ്‌സ് പറഞ്ഞു. ലോകത്ത് ഏറ്റവും കൂടുതല്‍ കൊവിഡ് ബാധിച്ചിട്ടുള്ള അമേരിക്കയില്‍ 1,35,000ത്തിലേറെ പേര്‍ വൈറസ് മൂലം മരിച്ചിട്ടുണ്ട്.