പുതുക്കാട്: അര്‍ബുദം ബാധിച്ച് മരിച്ചവരെ എല്ലാവര്‍ക്കും അറിയാം. അതിജീവിച്ച് ജീവിതം തിരിച്ചുപിടിച്ചവരെ ആരും ശ്രദ്ധിക്കാറില്ല.സമൂഹം ഭീതിയോടെ കാണുകയും ഭയന്നു മാറിനില്‍ക്കുകയും ചെയ്യുന്ന കാന്‍സറിനോട് പൊരുതി ജയിച്ചവരും പോരാടി നില്‍ക്കുന്നവരുമായ ഒരു സംഘം ആളുകളാണ് ചിമ്മിനിയില്‍ ഒത്തുകൂടിയത്.
കാന്‍സര്‍ ബാധിതരായവരുടെ വാട്‌സ് ആപ്പ് ഗ്രൂപ്പായ അതിജീവനത്തിലെ അംഗങ്ങളാണ് തങ്ങളുടെ അതിജീവനത്തിന്റെ കഥകള്‍ പങ്കുവെക്കാന്‍ ഒത്തുകൂടിയത്. സംസ്ഥാനത്തിന്റെ വിവിധ ഭാഗങ്ങളില്‍ നിന്നായി 44 അംഗങ്ങളാണ് ഗ്രൂപ്പിലുള്ളത്.
ഇതില്‍ ഭൂരിഭാഗം പേരും അവരുടെ കുടുംബാംഗങ്ങളും ചിമ്മിനി കാടുകളുടെ മനോഹാരിത ആസ്വദിക്കാന്‍ എത്തിയിരുന്നു. ആടിയുംപാടിയും ഒത്തുചേര്‍ന്നപ്പോഴും അവര്‍ക്കു പറയാനുണ്ടായിരുന്നത് കൊടിയവിധിയെ ഇച്ഛാശക്തി കൊണ്ടു മറികടന്ന കഠിനയാത്രയെക്കുറിച്ചായിരുന്നു.
തിരുവനന്തപുരം ആറ്റിങ്ങല്‍ സ്വദേശി നന്ദുമഹാദേവനായിരുന്നു അതിജീവനം ഗ്രൂപ്പിന്റെ മുഖ്യ സംഘാടകന്‍. ഇടുക്കിയില്‍ നിന്ന് സജിയും തൃശൂര്‍ പറപ്പൂക്കരയില്‍ നിന്നുള്ള പൊതുപ്രവര്‍ത്തകന്‍ രാമകൃഷണനും ചടങ്ങിന് നേതൃത്വം നല്‍കി. അന്നനാളം ചുരുങ്ങി ട്യൂബിലൂടെ ഭക്ഷണം കഴിക്കുന്ന പുള്ള് സ്വദേശി ലാല്‍സന്‍ ഭാര്യയും കുഞ്ഞുമൊത്താണ് എത്തിയത്. അടിയന്തര ശസ്ത്രക്രിയയ്ക്ക് വിധേയനാകാന്‍ പോകുന്ന ലാല്‍സന് ആത്മവിശ്വാസം നല്‍കുന്നതായിരുന്നു കൂട്ടായ്മ. അസുഖമാണെന്നറിഞ്ഞപ്പോള്‍ ഭര്‍ത്താവ് ഉപേക്ഷിച്ചു പോയ വരന്തരപ്പിള്ളി സ്വദേശിനി, അര്‍ബുധം ബാധിച്ച കാല്‍ മുറിച്ചു മാറ്റിയിട്ടും അതിജീവനത്തിന്റെ മാതൃകയും ഗ്രൂപ്പിന്റെ ജീവനാഡിയുമായ നന്ദു, കണ്ണൂരില്‍ നിന്നും മകനോടൊപ്പമെത്തിയ രമ്യ, ഈറോഡ് നിന്നെത്തിയ ലിസി, പെരിന്തല്‍മണ്ണയില്‍ നിന്ന് പ്രിയ.ജി.വാര്യര്‍, മൂന്നാറു നിന്നുള്ള ബിജോയ് ഇവരെല്ലാം പ്രത്യാശയുടേയും ശുഭാപ്തി വിശ്വാസത്തിന്റേയും കഥകള്‍ തന്നെയാണ് പങ്കുവെച്ചത്.