ദമ്പതികള്‍ കീടനാശിനി കഴിച്ച് ആത്മഹത്യക്ക് ശ്രമിച്ചു

വിവാദമായതോടെ       എസ്.പിയെയും കലക്ടറെയും തല്‍സ്ഥാനത്ത് നിന്ന് നീക്കി

ന്യൂഡല്‍ഹി: സര്‍ക്കാര്‍ ഭൂമിയില്‍ കൃഷി ചെയ്തതിന് ദലിത് കുടുംബത്തിന് പൊലിസിന്റെ ക്രൂരമര്‍ദനം. പൊലിസ് കൃഷിയും നശിപ്പിച്ചു. സംഭവത്തിന്‍ മനംനൊന്ത് ദമ്പതികള്‍ കീടനാശിനി കഴിച്ച് ആത്മഹത്യക്ക് ശ്രമിച്ചു. മധ്യപ്രദേശിലെ ഗുണയിലാണ് സംഭവം. സംഭവത്തിന്റെ വിഡിയോ പുറത്തുവരികയും പൊലിസ് നടപടിയില്‍ പ്രതിഷേധമുയരുകയും ചെയ്തതോടെ ഗുണ ജില്ലാ കലക്ടറെയും എസ്.പിയെയും സര്‍ക്കാര്‍ തല്‍സ്ഥാനത്ത് നിന്ന് നീക്കി. സംഭവത്തില്‍ മുഖ്യമന്ത്രി ശിവരാജ് സിങ് ചൗഹാന്‍ അന്വേഷണത്തിന് ഉത്തരവിട്ടിട്ടുണ്ട്. ആത്മഹത്യക്ക് ശ്രമിച്ച ദമ്പതികളായ രാംകുമാര്‍ അഹിര്‍വാര്‍ (38), സാവിത്രി ദേവി (35) എന്നിവര്‍ ചികിത്സയിലാണുള്ളത്. 

കോളജ് നിര്‍മിക്കാന്‍ സര്‍ക്കാര്‍ 2018ല്‍ അനുവദിച്ച സ്ഥലത്ത് രാംകുമാറും കുടുംബവും കുടില്‍കെട്ടി താമസിക്കുകയും കൃഷി ചെയ്യുകയും ചെയ്തുവെന്നാണ് സര്‍ക്കാര്‍ ആരോപിക്കുന്നത്. തങ്ങള്‍ ഇവിടെ വര്‍ഷങ്ങളായി താമസിക്കുകയും കൃഷി ചെയ്യുകയും ചെയ്യുന്നുണ്ടെന്ന് സാവിത്രി ദേവി പറയുന്നു. മൂന്ന് ലക്ഷം രൂപയുടെ കടമുണ്ടെന്നും ജീവിക്കാനാണ് കൃഷി ചെയ്യുന്നതെന്നും കുടുംബം പറയുന്നു. ഈ സ്ഥലത്ത് കൃഷി ചെയ്യുന്നതിന് ഒരു ഗുണ്ടാനേതാവാണ് ഇവരില്‍ നിന്ന് മൂന്നു ലക്ഷം വാങ്ങിയത്. 

കഴിഞ്ഞ ദിവസം ഇവരെ ഒഴിപ്പിക്കാന്‍ റവന്യൂ ഉദ്യോഗസ്ഥര്‍ പൊലിസുമായി എത്തുകയായിരുന്നു. ഒഴിഞ്ഞുപോകാന്‍ വിസമ്മതിച്ചതോടെ പൊലിസ് രാംകുമാറിനെയും സാവിത്രി ദേവിയെയും ക്രൂരമായി മര്‍ദിച്ചു. തടയാന്‍വന്ന ഇവരുടെ മക്കളെയും പൊലിസ് ആക്രമിച്ചു. വീണുകിടക്കുന്ന ഇവരുടെ മുകളില്‍ക്കിടന്ന് കുട്ടികള്‍ നിലവിളിക്കുന്ന ദൃശ്യങ്ങളും വിഡിയോയിലുണ്ട്. ഇതോടെ ജില്ലാ കലക്ടര്‍ വിശ്വനാഥന്‍, എസ്.പി തരുണ്‍ നായിക് എന്നിവരെ തല്‍സ്ഥാനത്ത് നിന്ന് നീക്കുകയായിരുന്നു.