കാക്കനാട്: കുളിര്‍മയോടെ കുരുന്നുകള്‍ അക്ഷരം നുകരുന്ന തൃക്കാക്കരയില്‍ ആദ്യത്തെ ശീതീകരിച്ച മാതൃക അങ്കണവാടി കെട്ടിടം വ്യവസായ ഐ.ടി നഗരമായ കാക്കനാടിലെ നവോദയയില്‍. തൃക്കാക്കര നഗരസഭയുടെ വാര്‍ഷിക പദ്ധതിയില്‍ ഉള്‍പ്പെടുത്തി അഞ്ച് ലക്ഷം രൂപയോളം മുടക്കി തൃക്കാക്കര ആറാം ഡിവിഷനില്‍ നവോദയ പള്ളത്തുപടിയിലെ 75ാം നമ്പര്‍ അങ്കണവാടി കെട്ടിടം ഉദ്ഘാടനത്തിനായി ഒരുക്കിയിരിക്കുന്നത്. 15ന് വൈകിട്ട് നാല് മണിക്ക് തൃക്കാക്കര നഗരസഭ ചെയര്‍പേഴ്‌സണ്‍ എം.ടി ഓമന ഉദ്ഘാടനം നിര്‍വഹിക്കും.

ആധുനിക രീതിയില്‍ നിര്‍മിച്ച കെട്ടിടത്തില്‍ ക്ലാസ് റൂം, അടുക്കള, രണ്ടു ശൗചാലയങ്ങള്‍, സ്റ്റോര്‍ എന്നിവയുണ്ട്. വാര്‍ഡ് കൗണ്‍സിലര്‍ എന്‍.കെ പ്രദീപും പ്രദേശവാസികളും ചേര്‍ന്നാണു കെട്ടിടത്തില്‍ വേണ്ട സൗകര്യങ്ങള്‍ ഒരുക്കിയത്. ക്ലാസ് മുറിയില്‍ വര്‍ണമനോഹരമായ ചിത്രങ്ങള്‍ വരച്ചു. സ്വകാര്യവ്യക്തി നല്‍കിയ എയര്‍കണ്ടീഷനര്‍ കുളിര്‍മയും നല്‍കി. വൈദ്യുതി ചാര്‍ജ് അടയ്ക്കുന്നതിനുള്ള തുക ജനകീയമായി കണ്ടെത്തും. 15 കുട്ടികളാണുള്ളത്. ഇവരുടെ അധ്യാപികയായി കാര്‍ത്ത്യായനി കുഞ്ഞപ്പന്‍ ഹെല്‍പറായി രാധ അയ്യപ്പന്‍കുട്ടിയും പ്രവര്‍ത്തിച്ചുവരുന്നു. ശീതീകരിച്ച അങ്കണവാടിയുടെ ഉദ്ഘാടനത്തോടൊപ്പം എസ്.എസ്.എല്‍.സി, പ്ലസ്ടു വിജയികളായ വിദ്യാര്‍ഥികളെ ആദരിക്കല്‍ ചടങ്ങ് നഗരസഭ ക്ഷേമകാര്യ അധ്യക്ഷന്‍ കെ.ടി എല്‍ദോയും, വിരമിച്ച അങ്കണവാടി ടീച്ചര്‍ ലക്ഷ്മി കുഞ്ഞമ്മയ്ക്ക് തെങ്ങോട് പൗരാവലിയുടെ ആദരം മുന്‍ പഞ്ചായത്ത് അംഗം സി.എന്‍ അപ്പുക്കുട്ടന്‍ നിര്‍വഹിക്കുമെന്നും വാര്‍ഡ് കൗണ്‍സിലര്‍ എന്‍.കെ പ്രദീപ് പറഞ്ഞു.